ಈ ಸೂಕ್ತಕ್ಕೆ ಅಡ್ಮಿನ್‌ನಲ್ಲಿ ಕನ್ನಡ ಅಧ್ಯಯನ ಮಾರ್ಗದರ್ಶಿ (Study Guide) ಇನ್ನೂ ರಚನೆಯಾಗಿಲ್ಲ. ಅಡ್ಮಿನ್‌ನಲ್ಲಿ Generate Study Guides ಮೂಲಕ ಕನ್ನಡ ಭಾಷೆಯನ್ನು ಆಯ್ಕೆಮಾಡಿ ರಚಿಸಬಹುದು.
ಸ್ತೀ॒ರ್ಣಂ ಬ॒ರ್ಹಿರುಪ॑ ನೋ ಯಾಹಿ ವೀ॒ತಯೇ॑ ಸ॒ಹಸ್ರೇ॑ಣ ನಿ॒ಯುತಾ॑ ನಿಯುತ್ವತೇ ಶ॒ತಿನೀ॑ಭಿರ್ನಿಯುತ್ವತೇ । ತುಭ್ಯಂ॒ ಹಿ ಪೂ॒ರ್ವಪೀ॑ತಯೇ ದೇ॒ವಾ ದೇ॒ವಾಯ॑ ಯೇಮಿ॒ರೇ । ಪ್ರ ತೇ॑ ಸು॒ತಾಸೋ॒ ಮಧು॑ಮಂತೋ ಅಸ್ಥಿರ॒ನ್ಮದಾ॑ಯ॒ ಕ್ರತ್ವೇ॑ ಅಸ್ಥಿರನ್ ॥
स्ती॒र्णं ब॒र्हिरुप॑ नो याहि वी॒तये॑ स॒हस्रे॑ण नि॒युता॑ नियुत्वते श॒तिनी॑भिर्नियुत्वते । तुभ्यं॒ हि पू॒र्वपी॑तये दे॒वा दे॒वाय॑ येमि॒रे । प्र ते॑ सु॒तासो॒ मधु॑मंतो अस्थिर॒न्मदा॑य॒ क्रत्वे॑ अस्थिरन् ॥
ತುಭ್ಯಾ॒ಯಂ ಸೋಮಃ॒ ಪರಿ॑ಪೂತೋ॒ ಅದ್ರಿ॑ಭಿಃ ಸ್ಪಾ॒ರ್ಹಾ ವಸಾ॑ನಃ॒ ಪರಿ॒ ಕೋಶ॑ಮರ್ಷತಿ ಶು॒ಕ್ರಾ ವಸಾ॑ನೋ ಅರ್ಷತಿ । ತವಾ॒ಯಂ ಭಾ॒ಗ ಆ॒ಯುಷು॒ ಸೋಮೋ॑ ದೇ॒ವೇಷು॑ ಹೂಯತೇ । ವಹ॑ ವಾಯೋ ನಿ॒ಯುತೋ॑ ಯಾಹ್ಯಸ್ಮ॒ಯುರ್ಜು॑ಷಾ॒ಣೋ ಯಾ॑ಹ್ಯಸ್ಮ॒ಯುಃ ॥
तुभ्या॒यं सोमः॒ परि॑पूतो॒ अद्रि॑भिः स्पा॒र्हा वसा॑नः॒ परि॒ कोश॑मर्षति शु॒क्रा वसा॑नो अर्षति । तवा॒यं भा॒ग आ॒युषु॒ सोमो॑ दे॒वेषु॑ हूयते । वह॑ वायो नि॒युतो॑ याह्यस्म॒युर्जु॑षा॒णो या॑ह्यस्म॒युः ॥
ಆ ನೋ॑ ನಿ॒ಯುದ್ಭಿಃ॑ ಶ॒ತಿನೀ॑ಭಿರಧ್ವ॒ರಂ ಸ॑ಹ॒ಸ್ರಿಣೀ॑ಭಿ॒ರುಪ॑ ಯಾಹಿ ವೀ॒ತಯೇ॒ ವಾಯೋ॑ ಹ॒ವ್ಯಾನಿ॑ ವೀ॒ತಯೇ॑ । ತವಾ॒ಯಂ ಭಾ॒ಗ ಋ॒ತ್ವಿಯಃ॒ ಸರ॑ಶ್ಮಿಃ॒ ಸೂರ್ಯೇ॒ ಸಚಾ॑ । ಅ॒ಧ್ವ॒ರ್ಯುಭಿ॒ರ್ಭರ॑ಮಾಣಾ ಅಯಂಸತ॒ ವಾಯೋ॑ ಶು॒ಕ್ರಾ ಅ॑ಯಂಸತ ॥
आ नो॑ नि॒युद्भिः॑ श॒तिनी॑भिरध्व॒रं स॑ह॒स्रिणी॑भि॒रुप॑ याहि वी॒तये॒ वायो॑ ह॒व्यानि॑ वी॒तये॑ । तवा॒यं भा॒ग ऋ॒त्वियः॒ सर॑श्मिः॒ सूर्ये॒ सचा॑ । अ॒ध्व॒र्युभि॒र्भर॑माणा अयंसत॒ वायो॑ शु॒क्रा अ॑यंसत ॥
ಆ ವಾಂ॒ ರಥೋ॑ ನಿ॒ಯುತ್ವಾ॑ನ್ವಕ್ಷ॒ದವ॑ಸೇ॒ಽಭಿ ಪ್ರಯಾಂ॑ಸಿ॒ ಸುಧಿ॑ತಾನಿ ವೀ॒ತಯೇ॒ ವಾಯೋ॑ ಹ॒ವ್ಯಾನಿ॑ ವೀ॒ತಯೇ॑ । ಪಿಬ॑ತಂ॒ ಮಧ್ವೋ॒ ಅಂಧ॑ಸಃ ಪೂರ್ವ॒ಪೇಯಂ॒ ಹಿ ವಾಂ॑ ಹಿ॒ತಂ । ವಾಯ॒ವಾ ಚಂ॒ದ್ರೇಣ॒ ರಾಧ॒ಸಾ ಗ॑ತ॒ಮಿಂದ್ರ॑ಶ್ಚ॒ ರಾಧ॒ಸಾ ಗ॑ತಂ ॥
आ वां॒ रथो॑ नि॒युत्वा॑न्वक्ष॒दव॑से॒ऽभि प्रयां॑सि॒ सुधि॑तानि वी॒तये॒ वायो॑ ह॒व्यानि॑ वी॒तये॑ । पिब॑तं॒ मध्वो॒ अंध॑सः पूर्व॒पेयं॒ हि वां॑ हि॒तं । वाय॒वा चं॒द्रेण॒ राध॒सा ग॑त॒मिंद्र॑श्च॒ राध॒सा ग॑तं ॥
ಆ ವಾಂ॒ ಧಿಯೋ॑ ವವೃತ್ಯುರಧ್ವ॒ರಾಁ ಉಪೇ॒ಮಮಿಂದುಂ॑ ಮರ್ಮೃಜಂತ ವಾ॒ಜಿನ॑ಮಾ॒ಶುಮತ್ಯಂ॒ ನ ವಾ॒ಜಿನಂ॑ । ತೇಷಾಂ॑ ಪಿಬತಮಸ್ಮ॒ಯೂ ಆ ನೋ॑ ಗಂತಮಿ॒ಹೋತ್ಯಾ । ಇಂದ್ರ॑ವಾಯೂ ಸು॒ತಾನಾ॒ಮದ್ರಿ॑ಭಿರ್ಯು॒ವಂ ಮದಾ॑ಯ ವಾಜದಾ ಯು॒ವಂ ॥
आ वां॒ धियो॑ ववृत्युरध्व॒राँ उपे॒ममिंदुं॑ मर्मृजंत वा॒जिन॑मा॒शुमत्यं॒ न वा॒जिनं॑ । तेषां॑ पिबतमस्म॒यू आ नो॑ गंतमि॒होत्या । इंद्र॑वायू सु॒ताना॒मद्रि॑भिर्यु॒वं मदा॑य वाजदा यु॒वं ॥
ಇ॒ಮೇ ವಾಂ॒ ಸೋಮಾ॑ ಅ॒ಪ್ಸ್ವಾ ಸು॒ತಾ ಇ॒ಹಾಧ್ವ॒ರ್ಯುಭಿ॒ರ್ಭರ॑ಮಾಣಾ ಅಯಂಸತ॒ ವಾಯೋ॑ ಶು॒ಕ್ರಾ ಅ॑ಯಂಸತ । ಏ॒ತೇ ವಾ॑ಮ॒ಭ್ಯ॑ಸೃಕ್ಷತ ತಿ॒ರಃ ಪ॒ವಿತ್ರ॑ಮಾ॒ಶವಃ॑ । ಯು॒ವಾ॒ಯವೋಽತಿ॒ ರೋಮಾ॑ಣ್ಯ॒ವ್ಯಯಾ॒ ಸೋಮಾ॑ಸೋ॒ ಅತ್ಯ॒ವ್ಯಯಾ॑ ॥
इ॒मे वां॒ सोमा॑ अ॒प्स्वा सु॒ता इ॒हाध्व॒र्युभि॒र्भर॑माणा अयंसत॒ वायो॑ शु॒क्रा अ॑यंसत । ए॒ते वा॑म॒भ्य॑सृक्षत ति॒रः प॒वित्र॑मा॒शवः॑ । यु॒वा॒यवोऽति॒ रोमा॑ण्य॒व्यया॒ सोमा॑सो॒ अत्य॒व्यया॑ ॥
ಅತಿ॑ ವಾಯೋ ಸಸ॒ತೋ ಯಾ॑ಹಿ॒ ಶಶ್ವ॑ತೋ॒ ಯತ್ರ॒ ಗ್ರಾವಾ॒ ವದ॑ತಿ॒ ತತ್ರ॑ ಗಚ್ಛತಂ ಗೃ॒ಹಮಿಂದ್ರ॑ಶ್ಚ ಗಚ್ಛತಂ । ವಿ ಸೂ॒ನೃತಾ॒ ದದೃ॑ಶೇ॒ ರೀಯ॑ತೇ ಘೃ॒ತಮಾ ಪೂ॒ರ್ಣಯಾ॑ ನಿ॒ಯುತಾ॑ ಯಾಥೋ ಅಧ್ವ॒ರಮಿಂದ್ರ॑ಶ್ಚ ಯಾಥೋ ಅಧ್ವ॒ರಂ ॥
अति॑ वायो सस॒तो या॑हि॒ शश्व॑तो॒ यत्र॒ ग्रावा॒ वद॑ति॒ तत्र॑ गच्छतं गृ॒हमिंद्र॑श्च गच्छतं । वि सू॒नृता॒ ददृ॑शे॒ रीय॑ते घृ॒तमा पू॒र्णया॑ नि॒युता॑ याथो अध्व॒रमिंद्र॑श्च याथो अध्व॒रं ॥
ಅತ್ರಾಹ॒ ತದ್ವ॑ಹೇಥೇ॒ ಮಧ್ವ॒ ಆಹು॑ತಿಂ॒ ಯಮ॑ಶ್ವ॒ತ್ಥಮು॑ಪ॒ತಿಷ್ಠಂ॑ತ ಜಾ॒ಯವೋ॒ಽಸ್ಮೇ ತೇ ಸಂ॑ತು ಜಾ॒ಯವಃ॑ । ಸಾ॒ಕಂ ಗಾವಃ॒ ಸುವ॑ತೇ॒ ಪಚ್ಯ॑ತೇ॒ ಯವೋ॒ ನ ತೇ॑ ವಾಯ॒ ಉಪ॑ ದಸ್ಯಂತಿ ಧೇ॒ನವೋ॒ ನಾಪ॑ ದಸ್ಯಂತಿ ಧೇ॒ನವಃ॑ ॥
अत्राह॒ तद्व॑हेथे॒ मध्व॒ आहु॑तिं॒ यम॑श्व॒त्थमु॑प॒तिष्ठं॑त जा॒यवो॒ऽस्मे ते सं॑तु जा॒यवः॑ । सा॒कं गावः॒ सुव॑ते॒ पच्य॑ते॒ यवो॒ न ते॑ वाय॒ उप॑ दस्यंति धे॒नवो॒ नाप॑ दस्यंति धे॒नवः॑ ॥
ಇ॒ಮೇ ಯೇ ತೇ॒ ಸು ವಾ॑ಯೋ ಬಾ॒ಹ್ವೋ॑ಜಸೋ॒ಽಂತರ್ನ॒ದೀ ತೇ॑ ಪ॒ತಯಂ॑ತ್ಯು॒ಕ್ಷಣೋ॒ ಮಹಿ॒ ವ್ರಾಧಂ॑ತ ಉ॒ಕ್ಷಣಃ॑ । ಧನ್ವ॑ಞ್ಚಿ॒ದ್ಯೇ ಅ॑ನಾ॒ಶವೋ॑ ಜೀ॒ರಾಶ್ಚಿ॒ದಗಿ॑ರೌಕಸಃ । ಸೂರ್ಯ॑ಸ್ಯೇವ ರ॒ಶ್ಮಯೋ॑ ದುರ್ನಿ॒ಯಂತ॑ವೋ॒ ಹಸ್ತ॑ಯೋರ್ದುರ್ನಿ॒ಯಂತ॑ವಃ ॥
इ॒मे ये ते॒ सु वा॑यो बा॒ह्वो॑जसो॒ऽंतर्न॒दी ते॑ प॒तयं॑त्यु॒क्षणो॒ महि॒ व्राधं॑त उ॒क्षणः॑ । धन्व॑ञ्चि॒द्ये अ॑ना॒शवो॑ जी॒राश्चि॒दगि॑रौकसः । सूर्य॑स्येव र॒श्मयो॑ दुर्नि॒यंत॑वो॒ हस्त॑योर्दुर्नि॒यंत॑वः ॥