ಈ ಸೂಕ್ತಕ್ಕೆ ಅಡ್ಮಿನ್‌ನಲ್ಲಿ ಕನ್ನಡ ಅಧ್ಯಯನ ಮಾರ್ಗದರ್ಶಿ (Study Guide) ಇನ್ನೂ ರಚನೆಯಾಗಿಲ್ಲ. ಅಡ್ಮಿನ್‌ನಲ್ಲಿ Generate Study Guides ಮೂಲಕ ಕನ್ನಡ ಭಾಷೆಯನ್ನು ಆಯ್ಕೆಮಾಡಿ ರಚಿಸಬಹುದು.
ಇಂದ್ರಾ॑ಯ॒ ಹಿ ದ್ಯೌರಸು॑ರೋ॒ ಅನ॑ಮ್ನ॒ತೇಂದ್ರಾ॑ಯ ಮ॒ಹೀ ಪೃ॑ಥಿ॒ವೀ ವರೀ॑ಮಭಿರ್ದ್ಯು॒ಮ್ನಸಾ॑ತಾ॒ ವರೀ॑ಮಭಿಃ । ಇಂದ್ರಂ॒ ವಿಶ್ವೇ॑ ಸ॒ಜೋಷ॑ಸೋ ದೇ॒ವಾಸೋ॑ ದಧಿರೇ ಪು॒ರಃ । ಇಂದ್ರಾ॑ಯ॒ ವಿಶ್ವಾ॒ ಸವ॑ನಾನಿ॒ ಮಾನು॑ಷಾ ರಾ॒ತಾನಿ॑ ಸಂತು॒ ಮಾನು॑ಷಾ ॥
इंद्रा॑य॒ हि द्यौरसु॑रो॒ अन॑म्न॒तेंद्रा॑य म॒ही पृ॑थि॒वी वरी॑मभिर्द्यु॒म्नसा॑ता॒ वरी॑मभिः । इंद्रं॒ विश्वे॑ स॒जोष॑सो दे॒वासो॑ दधिरे पु॒रः । इंद्रा॑य॒ विश्वा॒ सव॑नानि॒ मानु॑षा रा॒तानि॑ संतु॒ मानु॑षा ॥
ವಿಶ್ವೇ॑ಷು॒ ಹಿ ತ್ವಾ॒ ಸವ॑ನೇಷು ತುಂ॒ಜತೇ॑ ಸಮಾ॒ನಮೇಕಂ॒ ವೃಷ॑ಮಣ್ಯವಃ॒ ಪೃಥ॒ಕ್ ಸ್ವಃ॑ ಸನಿ॒ಷ್ಯವಃ॒ ಪೃಥ॑ಕ್ । ತಂ ತ್ವಾ॒ ನಾವಂ॒ ನ ಪ॒ರ್ಷಣಿಂ॑ ಶೂ॒ಷಸ್ಯ॑ ಧು॒ರಿ ಧೀ॑ಮಹಿ । ಇಂದ್ರಂ॒ ನ ಯ॒ಜ್ಞೈಶ್ಚಿ॒ತಯಂ॑ತ ಆ॒ಯವಃ॒ ಸ್ತೋಮೇ॑ಭಿ॒ರಿಂದ್ರ॑ಮಾ॒ಯವಃ॑ ॥
विश्वे॑षु॒ हि त्वा॒ सव॑नेषु तुं॒जते॑ समा॒नमेकं॒ वृष॑मण्यवः॒ पृथ॒क् स्वः॑ सनि॒ष्यवः॒ पृथ॑क् । तं त्वा॒ नावं॒ न प॒र्षणिं॑ शू॒षस्य॑ धु॒रि धी॑महि । इंद्रं॒ न य॒ज्ञैश्चि॒तयं॑त आ॒यवः॒ स्तोमे॑भि॒रिंद्र॑मा॒यवः॑ ॥
ವಿ ತ್ವಾ॑ ತತಸ್ರೇ ಮಿಥು॒ನಾ ಅ॑ವ॒ಸ್ಯವೋ॑ ವ್ರ॒ಜಸ್ಯ॑ ಸಾ॒ತಾ ಗವ್ಯ॑ಸ್ಯ ನಿಃ॒ಸೃಜಃ॒ ಸಕ್ಷಂ॑ತ ಇಂದ್ರ ನಿಃ॒ಸೃಜಃ॑ । ಯದ್ಗ॒ವ್ಯಂತಾ॒ ದ್ವಾ ಜನಾ॒ ಸ್ವ೧॒॑ರ್ಯಂತಾ॑ ಸ॒ಮೂಹ॑ಸಿ । ಆ॒ವಿಷ್ಕರಿ॑ಕ್ರ॒ದ್ವೃಷ॑ಣಂ ಸಚಾ॒ಭುವಂ॒ ವಜ್ರ॑ಮಿಂದ್ರ ಸಚಾ॒ಭುವಂ॑ ॥
वि त्वा॑ ततस्रे मिथु॒ना अ॑व॒स्यवो॑ व्र॒जस्य॑ सा॒ता गव्य॑स्य निः॒सृजः॒ सक्षं॑त इंद्र निः॒सृजः॑ । यद्ग॒व्यंता॒ द्वा जना॒ स्व१॒॑र्यंता॑ स॒मूह॑सि । आ॒विष्करि॑क्र॒द्वृष॑णं सचा॒भुवं॒ वज्र॑मिंद्र सचा॒भुवं॑ ॥
ವಿ॒ದುಷ್ಟೇ॑ ಅ॒ಸ್ಯ ವೀ॒ರ್ಯ॑ಸ್ಯ ಪೂ॒ರವಃ॒ ಪುರೋ॒ ಯದಿಂ॑ದ್ರ॒ ಶಾರ॑ದೀರ॒ವಾತಿ॑ರಃ ಸಾಸಹಾ॒ನೋ ಅ॒ವಾತಿ॑ರಃ । ಶಾಸ॒ಸ್ತಮಿಂ॑ದ್ರ॒ ಮರ್ತ್ಯ॒ಮಯ॑ಜ್ಯುಂ ಶವಸಸ್ಪತೇ । ಮ॒ಹೀಮ॑ಮುಷ್ಣಾಃ ಪೃಥಿ॒ವೀಮಿ॒ಮಾ ಅ॒ಪೋ ಮಂ॑ದಸಾ॒ನ ಇ॒ಮಾ ಅ॒ಪಃ ॥
वि॒दुष्टे॑ अ॒स्य वी॒र्य॑स्य पू॒रवः॒ पुरो॒ यदिं॑द्र॒ शार॑दीर॒वाति॑रः सासहा॒नो अ॒वाति॑रः । शास॒स्तमिं॑द्र॒ मर्त्य॒मय॑ज्युं शवसस्पते । म॒हीम॑मुष्णाः पृथि॒वीमि॒मा अ॒पो मं॑दसा॒न इ॒मा अ॒पः ॥
ಆದಿತ್ತೇ॑ ಅ॒ಸ್ಯ ವೀ॒ರ್ಯ॑ಸ್ಯ ಚರ್ಕಿರ॒ನ್ಮದೇ॑ಷು ವೃಷನ್ನು॒ಶಿಜೋ॒ ಯದಾವಿ॑ಥ ಸಖೀಯ॒ತೋ ಯದಾವಿ॑ಥ । ಚ॒ಕರ್ಥ॑ ಕಾ॒ರಮೇ॑ಭ್ಯಃ॒ ಪೃತ॑ನಾಸು॒ ಪ್ರವಂ॑ತವೇ । ತೇ ಅ॒ನ್ಯಾಮ॑ನ್ಯಾಂ ನ॒ದ್ಯಂ॑ ಸನಿಷ್ಣತ ಶ್ರವ॒ಸ್ಯಂತಃ॑ ಸನಿಷ್ಣತ ॥
आदित्ते॑ अ॒स्य वी॒र्य॑स्य चर्किर॒न्मदे॑षु वृषन्नु॒शिजो॒ यदावि॑थ सखीय॒तो यदावि॑थ । च॒कर्थ॑ का॒रमे॑भ्यः॒ पृत॑नासु॒ प्रवं॑तवे । ते अ॒न्याम॑न्यां न॒द्यं॑ सनिष्णत श्रव॒स्यंतः॑ सनिष्णत ॥
ಉ॒ತೋ ನೋ॑ ಅ॒ಸ್ಯಾ ಉ॒ಷಸೋ॑ ಜು॒ಷೇತ॒ ಹ್ಯ೧॒॑ರ್ಕಸ್ಯ॑ ಬೋಧಿ ಹ॒ವಿಷೋ॒ ಹವೀ॑ಮಭಿಃ॒ ಸ್ವ॑ರ್ಷಾತಾ॒ ಹವೀ॑ಮಭಿಃ । ಯದಿಂ॑ದ್ರ॒ ಹಂತ॑ವೇ॒ ಮೃಧೋ॒ ವೃಷಾ॑ ವಜ್ರಿ॒ಞ್ಚಿಕೇ॑ತಸಿ । ಆ ಮೇ॑ ಅ॒ಸ್ಯ ವೇ॒ಧಸೋ॒ ನವೀ॑ಯಸೋ॒ ಮನ್ಮ॑ ಶ್ರುಧಿ॒ ನವೀ॑ಯಸಃ ॥
उ॒तो नो॑ अ॒स्या उ॒षसो॑ जु॒षेत॒ ह्य१॒॑र्कस्य॑ बोधि ह॒विषो॒ हवी॑मभिः॒ स्व॑र्षाता॒ हवी॑मभिः । यदिं॑द्र॒ हंत॑वे॒ मृधो॒ वृषा॑ वज्रि॒ञ्चिके॑तसि । आ मे॑ अ॒स्य वे॒धसो॒ नवी॑यसो॒ मन्म॑ श्रुधि॒ नवी॑यसः ॥
ತ್ವಂ ತಮಿಂ॑ದ್ರ ವಾವೃಧಾ॒ನೋ ಅ॑ಸ್ಮ॒ಯುರ॑ಮಿತ್ರ॒ಯಂತಂ॑ ತುವಿಜಾತ॒ ಮರ್ತ್ಯಂ॒ ವಜ್ರೇ॑ಣ ಶೂರ॒ ಮರ್ತ್ಯಂ॑ । ಜ॒ಹಿ ಯೋ ನೋ॑ ಅಘಾ॒ಯತಿ॑ ಶೃಣು॒ಷ್ವ ಸು॒ಶ್ರವ॑ಸ್ತಮಃ । ರಿ॒ಷ್ಟಂ ನ ಯಾಮ॒ನ್ನಪ॑ ಭೂತು ದುರ್ಮ॒ತಿರ್ವಿಶ್ವಾಪ॑ ಭೂತು ದುರ್ಮ॒ತಿಃ ॥
त्वं तमिं॑द्र वावृधा॒नो अ॑स्म॒युर॑मित्र॒यंतं॑ तुविजात॒ मर्त्यं॒ वज्रे॑ण शूर॒ मर्त्यं॑ । ज॒हि यो नो॑ अघा॒यति॑ शृणु॒ष्व सु॒श्रव॑स्तमः । रि॒ष्टं न याम॒न्नप॑ भूतु दुर्म॒तिर्विश्वाप॑ भूतु दुर्म॒तिः ॥