ಈ ಸೂಕ್ತಕ್ಕೆ ಅಡ್ಮಿನ್‌ನಲ್ಲಿ ಕನ್ನಡ ಅಧ್ಯಯನ ಮಾರ್ಗದರ್ಶಿ (Study Guide) ಇನ್ನೂ ರಚನೆಯಾಗಿಲ್ಲ. ಅಡ್ಮಿನ್‌ನಲ್ಲಿ Generate Study Guides ಮೂಲಕ ಕನ್ನಡ ಭಾಷೆಯನ್ನು ಆಯ್ಕೆಮಾಡಿ ರಚಿಸಬಹುದು.
ಏಂದ್ರ॑ ಯಾ॒ಹ್ಯುಪ॑ ನಃ ಪರಾ॒ವತೋ॒ ನಾಯಮಚ್ಛಾ॑ ವಿ॒ದಥಾ॑ನೀವ॒ ಸತ್ಪ॑ತಿ॒ರಸ್ತಂ॒ ರಾಜೇ॑ವ॒ ಸತ್ಪ॑ತಿಃ । ಹವಾ॑ಮಹೇ ತ್ವಾ ವ॒ಯಂ ಪ್ರಯ॑ಸ್ವಂತಃ ಸು॒ತೇ ಸಚಾ॑ । ಪು॒ತ್ರಾಸೋ॒ ನ ಪಿ॒ತರಂ॒ ವಾಜ॑ಸಾತಯೇ॒ ಮಂಹಿ॑ಷ್ಠಂ॒ ವಾಜ॑ಸಾತಯೇ ॥
एंद्र॑ या॒ह्युप॑ नः परा॒वतो॒ नायमच्छा॑ वि॒दथा॑नीव॒ सत्प॑ति॒रस्तं॒ राजे॑व॒ सत्प॑तिः । हवा॑महे त्वा व॒यं प्रय॑स्वंतः सु॒ते सचा॑ । पु॒त्रासो॒ न पि॒तरं॒ वाज॑सातये॒ मंहि॑ष्ठं॒ वाज॑सातये ॥
ಪಿಬಾ॒ ಸೋಮ॑ಮಿಂದ್ರ ಸುವಾ॒ನಮದ್ರಿ॑ಭಿಃ॒ ಕೋಶೇ॑ನ ಸಿ॒ಕ್ತಮ॑ವ॒ತಂ ನ ವಂಸ॑ಗಸ್ತಾತೃಷಾ॒ಣೋ ನ ವಂಸ॑ಗಃ । ಮದಾ॑ಯ ಹರ್ಯ॒ತಾಯ॑ ತೇ ತು॒ವಿಷ್ಟ॑ಮಾಯ॒ ಧಾಯ॑ಸೇ । ಆ ತ್ವಾ॑ ಯಚ್ಛಂತು ಹ॒ರಿತೋ॒ ನ ಸೂರ್ಯ॒ಮಹಾ॒ ವಿಶ್ವೇ॑ವ॒ ಸೂರ್ಯಂ॑ ॥
पिबा॒ सोम॑मिंद्र सुवा॒नमद्रि॑भिः॒ कोशे॑न सि॒क्तम॑व॒तं न वंस॑गस्तातृषा॒णो न वंस॑गः । मदा॑य हर्य॒ताय॑ ते तु॒विष्ट॑माय॒ धाय॑से । आ त्वा॑ यच्छंतु ह॒रितो॒ न सूर्य॒महा॒ विश्वे॑व॒ सूर्यं॑ ॥
ಅವಿಂ॑ದದ್ದಿ॒ವೋ ನಿಹಿ॑ತಂ॒ ಗುಹಾ॑ ನಿ॒ಧಿಂ ವೇರ್ನ ಗರ್ಭಂ॒ ಪರಿ॑ವೀತ॒ಮಶ್ಮ॑ನ್ಯನಂ॒ತೇ ಅಂ॒ತರಶ್ಮ॑ನಿ । ವ್ರ॒ಜಂ ವ॒ಜ್ರೀ ಗವಾ॑ಮಿವ॒ ಸಿಷಾ॑ಸ॒ನ್ನಂಗಿ॑ರಸ್ತಮಃ । ಅಪಾ॑ವೃಣೋ॒ದಿಷ॒ ಇಂದ್ರಃ॒ ಪರೀ॑ವೃತಾ॒ ದ್ವಾರ॒ ಇಷಃ॒ ಪರೀ॑ವೃತಾಃ ॥
अविं॑दद्दि॒वो निहि॑तं॒ गुहा॑ नि॒धिं वेर्न गर्भं॒ परि॑वीत॒मश्म॑न्यनं॒ते अं॒तरश्म॑नि । व्र॒जं व॒ज्री गवा॑मिव॒ सिषा॑स॒न्नंगि॑रस्तमः । अपा॑वृणो॒दिष॒ इंद्रः॒ परी॑वृता॒ द्वार॒ इषः॒ परी॑वृताः ॥
ದಾ॒ದೃ॒ಹಾ॒ಣೋ ವಜ್ರ॒ಮಿಂದ್ರೋ॒ ಗಭ॑ಸ್ತ್ಯೋಃ॒ ಕ್ಷದ್ಮೇ॑ವ ತಿ॒ಗ್ಮಮಸ॑ನಾಯ॒ ಸಂ ಶ್ಯ॑ದಹಿ॒ಹತ್ಯಾ॑ಯ॒ ಸಂ ಶ್ಯ॑ತ್ । ಸಂ॒ವಿ॒ವ್ಯಾ॒ನ ಓಜ॑ಸಾ॒ ಶವೋ॑ಭಿರಿಂದ್ರ ಮ॒ಜ್ಮನಾ॑ । ತಷ್ಟೇ॑ವ ವೃ॒ಕ್ಷಂ ವ॒ನಿನೋ॒ ನಿ ವೃ॑ಶ್ಚಸಿ ಪರ॒ಶ್ವೇವ॒ ನಿ ವೃ॑ಶ್ಚಸಿ ॥
दा॒दृ॒हा॒णो वज्र॒मिंद्रो॒ गभ॑स्त्योः॒ क्षद्मे॑व ति॒ग्ममस॑नाय॒ सं श्य॑दहि॒हत्या॑य॒ सं श्य॑त् । सं॒वि॒व्या॒न ओज॑सा॒ शवो॑भिरिंद्र म॒ज्मना॑ । तष्टे॑व वृ॒क्षं व॒निनो॒ नि वृ॑श्चसि पर॒श्वेव॒ नि वृ॑श्चसि ॥
ತ್ವಂ ವೃಥಾ॑ ನ॒ದ್ಯ॑ ಇಂದ್ರ॒ ಸರ್ತ॒ವೇಽಚ್ಛಾ॑ ಸಮು॒ದ್ರಮ॑ಸೃಜೋ॒ ರಥಾಁ॑ ಇವ ವಾಜಯ॒ತೋ ರಥಾಁ॑ ಇವ । ಇ॒ತ ಊ॒ತೀರ॑ಯುಂಜತ ಸಮಾ॒ನಮರ್ಥ॒ಮಕ್ಷಿ॑ತಂ । ಧೇ॒ನೂರಿ॑ವ॒ ಮನ॑ವೇ ವಿ॒ಶ್ವದೋ॑ಹಸೋ॒ ಜನಾ॑ಯ ವಿ॒ಶ್ವದೋ॑ಹಸಃ ॥
त्वं वृथा॑ न॒द्य॑ इंद्र॒ सर्त॒वेऽच्छा॑ समु॒द्रम॑सृजो॒ रथाँ॑ इव वाजय॒तो रथाँ॑ इव । इ॒त ऊ॒तीर॑युंजत समा॒नमर्थ॒मक्षि॑तं । धे॒नूरि॑व॒ मन॑वे वि॒श्वदो॑हसो॒ जना॑य वि॒श्वदो॑हसः ॥
ಇ॒ಮಾಂ ತೇ॒ ವಾಚಂ॑ ವಸೂ॒ಯಂತ॑ ಆ॒ಯವೋ॒ ರಥಂ॒ ನ ಧೀರಃ॒ ಸ್ವಪಾ॑ ಅತಕ್ಷಿಷುಃ ಸು॒ಮ್ನಾಯ॒ ತ್ವಾಮ॑ತಕ್ಷಿಷುಃ । ಶುಂ॒ಭಂತೋ॒ ಜೇನ್ಯಂ॑ ಯಥಾ॒ ವಾಜೇ॑ಷು ವಿಪ್ರ ವಾ॒ಜಿನಂ॑ । ಅತ್ಯ॑ಮಿವ॒ ಶವ॑ಸೇ ಸಾ॒ತಯೇ॒ ಧನಾ॒ ವಿಶ್ವಾ॒ ಧನಾ॑ನಿ ಸಾ॒ತಯೇ॑ ॥
इ॒मां ते॒ वाचं॑ वसू॒यंत॑ आ॒यवो॒ रथं॒ न धीरः॒ स्वपा॑ अतक्षिषुः सु॒म्नाय॒ त्वाम॑तक्षिषुः । शुं॒भंतो॒ जेन्यं॑ यथा॒ वाजे॑षु विप्र वा॒जिनं॑ । अत्य॑मिव॒ शव॑से सा॒तये॒ धना॒ विश्वा॒ धना॑नि सा॒तये॑ ॥
ಭಿ॒ನತ್ಪುರೋ॑ ನವ॒ತಿಮಿಂ॑ದ್ರ ಪೂ॒ರವೇ॒ ದಿವೋ॑ದಾಸಾಯ॒ ಮಹಿ॑ ದಾ॒ಶುಷೇ॑ ನೃತೋ॒ ವಜ್ರೇ॑ಣ ದಾ॒ಶುಷೇ॑ ನೃತೋ । ಅ॒ತಿ॒ಥಿ॒ಗ್ವಾಯ॒ ಶಂಬ॑ರಂ ಗಿ॒ರೇರು॒ಗ್ರೋ ಅವಾ॑ಭರತ್ । ಮ॒ಹೋ ಧನಾ॑ನಿ॒ ದಯ॑ಮಾನ॒ ಓಜ॑ಸಾ॒ ವಿಶ್ವಾ॒ ಧನಾ॒ನ್ಯೋಜ॑ಸಾ ॥
भि॒नत्पुरो॑ नव॒तिमिं॑द्र पू॒रवे॒ दिवो॑दासाय॒ महि॑ दा॒शुषे॑ नृतो॒ वज्रे॑ण दा॒शुषे॑ नृतो । अ॒ति॒थि॒ग्वाय॒ शंब॑रं गि॒रेरु॒ग्रो अवा॑भरत् । म॒हो धना॑नि॒ दय॑मान॒ ओज॑सा॒ विश्वा॒ धना॒न्योज॑सा ॥
ಇಂದ್ರಃ॑ ಸ॒ಮತ್ಸು॒ ಯಜ॑ಮಾನ॒ಮಾರ್ಯಂ॒ ಪ್ರಾವ॒ದ್ವಿಶ್ವೇ॑ಷು ಶ॒ತಮೂ॑ತಿರಾ॒ಜಿಷು॒ ಸ್ವ॑ರ್ಮೀಳ್ಹೇಷ್ವಾ॒ಜಿಷು॑ । ಮನ॑ವೇ॒ ಶಾಸ॑ದವ್ರ॒ತಾಂತ್ವಚಂ॑ ಕೃ॒ಷ್ಣಾಮ॑ರಂಧಯತ್ । ದಕ್ಷ॒ನ್ನ ವಿಶ್ವಂ॑ ತತೃಷಾ॒ಣಮೋ॑ಷತಿ॒ ನ್ಯ॑ರ್ಶಸಾ॒ನಮೋ॑ಷತಿ ॥
इंद्रः॑ स॒मत्सु॒ यज॑मान॒मार्यं॒ प्राव॒द्विश्वे॑षु श॒तमू॑तिरा॒जिषु॒ स्व॑र्मीळ्हेष्वा॒जिषु॑ । मन॑वे॒ शास॑दव्र॒तांत्वचं॑ कृ॒ष्णाम॑रंधयत् । दक्ष॒न्न विश्वं॑ ततृषा॒णमो॑षति॒ न्य॑र्शसा॒नमो॑षति ॥
ಸೂರ॑ಶ್ಚ॒ಕ್ರಂ ಪ್ರ ವೃ॑ಹಜ್ಜಾ॒ತ ಓಜ॑ಸಾ ಪ್ರಪಿ॒ತ್ವೇ ವಾಚ॑ಮರು॒ಣೋ ಮು॑ಷಾಯತೀಶಾ॒ನ ಆ ಮು॑ಷಾಯತಿ । ಉ॒ಶನಾ॒ ಯತ್ಪ॑ರಾ॒ವತೋಽಜ॑ಗನ್ನೂ॒ತಯೇ॑ ಕವೇ । ಸು॒ಮ್ನಾನಿ॒ ವಿಶ್ವಾ॒ ಮನು॑ಷೇವ ತು॒ರ್ವಣಿ॒ರಹಾ॒ ವಿಶ್ವೇ॑ವ ತು॒ರ್ವಣಿಃ॑ ॥
सूर॑श्च॒क्रं प्र वृ॑हज्जा॒त ओज॑सा प्रपि॒त्वे वाच॑मरु॒णो मु॑षायतीशा॒न आ मु॑षायति । उ॒शना॒ यत्प॑रा॒वतोऽज॑गन्नू॒तये॑ कवे । सु॒म्नानि॒ विश्वा॒ मनु॑षेव तु॒र्वणि॒रहा॒ विश्वे॑व तु॒र्वणिः॑ ॥
ಸ ನೋ॒ ನವ್ಯೇ॑ಭಿರ್ವೃಷಕರ್ಮನ್ನು॒ಕ್ಥೈಃ ಪುರಾಂ॑ ದರ್ತಃ ಪಾ॒ಯುಭಿಃ॑ ಪಾಹಿ ಶ॒ಗ್ಮೈಃ । ದಿ॒ವೋ॒ದಾ॒ಸೇಭಿ॑ರಿಂದ್ರ॒ ಸ್ತವಾ॑ನೋ ವಾವೃಧೀ॒ಥಾ ಅಹೋ॑ಭಿರಿವ॒ ದ್ಯೌಃ ॥
स नो॒ नव्ये॑भिर्वृषकर्मन्नु॒क्थैः पुरां॑ दर्तः पा॒युभिः॑ पाहि श॒ग्मैः । दि॒वो॒दा॒सेभि॑रिंद्र॒ स्तवा॑नो वावृधी॒था अहो॑भिरिव॒ द्यौः ॥