ಈ ಸೂಕ್ತಕ್ಕೆ ಅಡ್ಮಿನ್‌ನಲ್ಲಿ ಕನ್ನಡ ಅಧ್ಯಯನ ಮಾರ್ಗದರ್ಶಿ (Study Guide) ಇನ್ನೂ ರಚನೆಯಾಗಿಲ್ಲ. ಅಡ್ಮಿನ್‌ನಲ್ಲಿ Generate Study Guides ಮೂಲಕ ಕನ್ನಡ ಭಾಷೆಯನ್ನು ಆಯ್ಕೆಮಾಡಿ ರಚಿಸಬಹುದು.
ಅ॒ಯಂ ಜಾ॑ಯತ॒ ಮನು॑ಷೋ॒ ಧರೀ॑ಮಣಿ॒ ಹೋತಾ॒ ಯಜಿ॑ಷ್ಠ ಉ॒ಶಿಜಾ॒ಮನು॑ ವ್ರ॒ತಮ॒ಗ್ನಿಃ ಸ್ವಮನು॑ ವ್ರ॒ತಂ । ವಿ॒ಶ್ವಶ್ರು॑ಷ್ಟಿಃ ಸಖೀಯ॒ತೇ ರ॒ಯಿರಿ॑ವ ಶ್ರವಸ್ಯ॒ತೇ । ಅದ॑ಬ್ಧೋ॒ ಹೋತಾ॒ ನಿ ಷ॑ದದಿ॒ಳಸ್ಪ॒ದೇ ಪರಿ॑ವೀತ ಇ॒ಳಸ್ಪ॒ದೇ ॥
अ॒यं जा॑यत॒ मनु॑षो॒ धरी॑मणि॒ होता॒ यजि॑ष्ठ उ॒शिजा॒मनु॑ व्र॒तम॒ग्निः स्वमनु॑ व्र॒तं । वि॒श्वश्रु॑ष्टिः सखीय॒ते र॒यिरि॑व श्रवस्य॒ते । अद॑ब्धो॒ होता॒ नि ष॑ददि॒ळस्प॒दे परि॑वीत इ॒ळस्प॒दे ॥
ತಂ ಯ॑ಜ್ಞ॒ಸಾಧ॒ಮಪಿ॑ ವಾತಯಾಮಸ್ಯೃ॒ತಸ್ಯ॑ ಪ॒ಥಾ ನಮ॑ಸಾ ಹ॒ವಿಷ್ಮ॑ತಾ ದೇ॒ವತಾ॑ತಾ ಹ॒ವಿಷ್ಮ॑ತಾ । ಸ ನ॑ ಊ॒ರ್ಜಾಮು॒ಪಾಭೃ॑ತ್ಯ॒ಯಾ ಕೃ॒ಪಾ ನ ಜೂ॑ರ್ಯತಿ । ಯಂ ಮಾ॑ತ॒ರಿಶ್ವಾ॒ ಮನ॑ವೇ ಪರಾ॒ವತೋ॑ ದೇ॒ವಂ ಭಾಃ ಪ॑ರಾ॒ವತಃ॑ ॥
तं य॑ज्ञ॒साध॒मपि॑ वातयामस्यृ॒तस्य॑ प॒था नम॑सा ह॒विष्म॑ता दे॒वता॑ता ह॒विष्म॑ता । स न॑ ऊ॒र्जामु॒पाभृ॑त्य॒या कृ॒पा न जू॑र्यति । यं मा॑त॒रिश्वा॒ मन॑वे परा॒वतो॑ दे॒वं भाः प॑रा॒वतः॑ ॥
ಏವೇ॑ನ ಸ॒ದ್ಯಃ ಪರ್ಯೇ॑ತಿ॒ ಪಾರ್ಥಿ॑ವಂ ಮುಹು॒ರ್ಗೀ ರೇತೋ॑ ವೃಷ॒ಭಃ ಕನಿ॑ಕ್ರದ॒ದ್ದಧ॒ದ್ರೇತಃ॒ ಕನಿ॑ಕ್ರದತ್ । ಶ॒ತಂ ಚಕ್ಷಾ॑ಣೋ ಅ॒ಕ್ಷಭಿ॑ರ್ದೇ॒ವೋ ವನೇ॑ಷು ತು॒ರ್ವಣಿಃ॑ । ಸದೋ॒ ದಧಾ॑ನ॒ ಉಪ॑ರೇಷು॒ ಸಾನು॑ಷ್ವ॒ಗ್ನಿಃ ಪರೇ॑ಷು॒ ಸಾನು॑ಷು ॥
एवे॑न स॒द्यः पर्ये॑ति॒ पार्थि॑वं मुहु॒र्गी रेतो॑ वृष॒भः कनि॑क्रद॒द्दध॒द्रेतः॒ कनि॑क्रदत् । श॒तं चक्षा॑णो अ॒क्षभि॑र्दे॒वो वने॑षु तु॒र्वणिः॑ । सदो॒ दधा॑न॒ उप॑रेषु॒ सानु॑ष्व॒ग्निः परे॑षु॒ सानु॑षु ॥
ಸ ಸು॒ಕ್ರತುಃ॑ ಪು॒ರೋಹಿ॑ತೋ॒ ದಮೇ॑ದಮೇ॒ಽಗ್ನಿರ್ಯ॒ಜ್ಞಸ್ಯಾ॑ಧ್ವ॒ರಸ್ಯ॑ ಚೇತತಿ॒ ಕ್ರತ್ವಾ॑ ಯ॒ಜ್ಞಸ್ಯ॑ ಚೇತತಿ । ಕ್ರತ್ವಾ॑ ವೇ॒ಧಾ ಇ॑ಷೂಯ॒ತೇ ವಿಶ್ವಾ॑ ಜಾ॒ತಾನಿ॑ ಪಸ್ಪಶೇ । ಯತೋ॑ ಘೃತ॒ಶ್ರೀರತಿ॑ಥಿ॒ರಜಾ॑ಯತ॒ ವಹ್ನಿ॑ರ್ವೇ॒ಧಾ ಅಜಾ॑ಯತ ॥
स सु॒क्रतुः॑ पु॒रोहि॑तो॒ दमे॑दमे॒ऽग्निर्य॒ज्ञस्या॑ध्व॒रस्य॑ चेतति॒ क्रत्वा॑ य॒ज्ञस्य॑ चेतति । क्रत्वा॑ वे॒धा इ॑षूय॒ते विश्वा॑ जा॒तानि॑ पस्पशे । यतो॑ घृत॒श्रीरति॑थि॒रजा॑यत॒ वह्नि॑र्वे॒धा अजा॑यत ॥
ಕ್ರತ್ವಾ॒ ಯದ॑ಸ್ಯ॒ ತವಿ॑ಷೀಷು ಪೃಂ॒ಚತೇ॒ಽಗ್ನೇರವೇ॑ಣ ಮ॒ರುತಾಂ॒ ನ ಭೋ॒ಜ್ಯೇ॑ಷಿ॒ರಾಯ॒ ನ ಭೋ॒ಜ್ಯಾ॑ । ಸ ಹಿ ಷ್ಮಾ॒ ದಾನ॒ಮಿನ್ವ॑ತಿ॒ ವಸೂ॑ನಾಂ ಚ ಮ॒ಜ್ಮನಾ॑ । ಸ ನ॑ಸ್ತ್ರಾಸತೇ ದುರಿ॒ತಾದ॑ಭಿ॒ಹ್ರುತಃ॒ ಶಂಸಾ॑ದ॒ಘಾದ॑ಭಿ॒ಹ್ರುತಃ॑ ॥
क्रत्वा॒ यद॑स्य॒ तवि॑षीषु पृं॒चते॒ऽग्नेरवे॑ण म॒रुतां॒ न भो॒ज्ये॑षि॒राय॒ न भो॒ज्या॑ । स हि ष्मा॒ दान॒मिन्व॑ति॒ वसू॑नां च म॒ज्मना॑ । स न॑स्त्रासते दुरि॒ताद॑भि॒ह्रुतः॒ शंसा॑द॒घाद॑भि॒ह्रुतः॑ ॥
ವಿಶ್ವೋ॒ ವಿಹಾ॑ಯಾ ಅರ॒ತಿರ್ವಸು॑ರ್ದಧೇ॒ ಹಸ್ತೇ॒ ದಕ್ಷಿ॑ಣೇ ತ॒ರಣಿ॒ರ್ನ ಶಿ॑ಶ್ರಥಚ್ಛ್ರವ॒ಸ್ಯಯಾ॒ ನ ಶಿ॑ಶ್ರಥತ್ । ವಿಶ್ವ॑ಸ್ಮಾ॒ ಇದಿ॑ಷುಧ್ಯ॒ತೇ ದೇ॑ವ॒ತ್ರಾ ಹ॒ವ್ಯಮೋಹಿ॑ಷೇ । ವಿಶ್ವ॑ಸ್ಮಾ॒ ಇತ್ಸು॒ಕೃತೇ॒ ವಾರ॑ಮೃಣ್ವತ್ಯ॒ಗ್ನಿರ್ದ್ವಾರಾ॒ ವ್ಯೃ॑ಣ್ವತಿ ॥
विश्वो॒ विहा॑या अर॒तिर्वसु॑र्दधे॒ हस्ते॒ दक्षि॑णे त॒रणि॒र्न शि॑श्रथच्छ्रव॒स्यया॒ न शि॑श्रथत् । विश्व॑स्मा॒ इदि॑षुध्य॒ते दे॑व॒त्रा ह॒व्यमोहि॑षे । विश्व॑स्मा॒ इत्सु॒कृते॒ वार॑मृण्वत्य॒ग्निर्द्वारा॒ व्यृ॑ण्वति ॥
ಸ ಮಾನು॑ಷೇ ವೃ॒ಜನೇ॒ ಶಂತ॑ಮೋ ಹಿ॒ತೋ॒೩॒॑ಽಗ್ನಿರ್ಯ॒ಜ್ಞೇಷು॒ ಜೇನ್ಯೋ॒ ನ ವಿ॒ಶ್ಪತಿಃ॑ ಪ್ರಿ॒ಯೋ ಯ॒ಜ್ಞೇಷು॑ ವಿ॒ಶ್ಪತಿಃ॑ । ಸ ಹ॒ವ್ಯಾ ಮಾನು॑ಷಾಣಾಮಿ॒ಳಾ ಕೃ॒ತಾನಿ॑ ಪತ್ಯತೇ । ಸ ನ॑ಸ್ತ್ರಾಸತೇ॒ ವರು॑ಣಸ್ಯ ಧೂ॒ರ್ತೇರ್ಮ॒ಹೋ ದೇ॒ವಸ್ಯ॑ ಧೂ॒ರ್ತೇಃ ॥
स मानु॑षे वृ॒जने॒ शंत॑मो हि॒तो॒३॒॑ऽग्निर्य॒ज्ञेषु॒ जेन्यो॒ न वि॒श्पतिः॑ प्रि॒यो य॒ज्ञेषु॑ वि॒श्पतिः॑ । स ह॒व्या मानु॑षाणामि॒ळा कृ॒तानि॑ पत्यते । स न॑स्त्रासते॒ वरु॑णस्य धू॒र्तेर्म॒हो दे॒वस्य॑ धू॒र्तेः ॥
ಅ॒ಗ್ನಿಂ ಹೋತಾ॑ರಮೀಳತೇ॒ ವಸು॑ಧಿತಿಂ ಪ್ರಿ॒ಯಂ ಚೇತಿ॑ಷ್ಠಮರ॒ತಿಂ ನ್ಯೇ॑ರಿರೇ ಹವ್ಯ॒ವಾಹಂ॒ ನ್ಯೇ॑ರಿರೇ । ವಿ॒ಶ್ವಾಯುಂ॑ ವಿ॒ಶ್ವವೇ॑ದಸಂ॒ ಹೋತಾ॑ರಂ ಯಜ॒ತಂ ಕ॒ವಿಂ । ದೇ॒ವಾಸೋ॑ ರ॒ಣ್ವಮವ॑ಸೇ ವಸೂ॒ಯವೋ॑ ಗೀ॒ರ್ಭೀ ರ॒ಣ್ವಂ ವ॑ಸೂ॒ಯವಃ॑ ॥
अ॒ग्निं होता॑रमीळते॒ वसु॑धितिं प्रि॒यं चेति॑ष्ठमर॒तिं न्ये॑रिरे हव्य॒वाहं॒ न्ये॑रिरे । वि॒श्वायुं॑ वि॒श्ववे॑दसं॒ होता॑रं यज॒तं क॒विं । दे॒वासो॑ र॒ण्वमव॑से वसू॒यवो॑ गी॒र्भी र॒ण्वं व॑सू॒यवः॑ ॥