ಈ ಸೂಕ್ತಕ್ಕೆ ಅಡ್ಮಿನ್‌ನಲ್ಲಿ ಕನ್ನಡ ಅಧ್ಯಯನ ಮಾರ್ಗದರ್ಶಿ (Study Guide) ಇನ್ನೂ ರಚನೆಯಾಗಿಲ್ಲ. ಅಡ್ಮಿನ್‌ನಲ್ಲಿ Generate Study Guides ಮೂಲಕ ಕನ್ನಡ ಭಾಷೆಯನ್ನು ಆಯ್ಕೆಮಾಡಿ ರಚಿಸಬಹುದು.
ಅ॒ಗ್ನಿಂ ಹೋತಾ॑ರಂ ಮನ್ಯೇ॒ ದಾಸ್ವಂ॑ತಂ॒ ವಸುಂ॑ ಸೂ॒ನುಂ ಸಹ॑ಸೋ ಜಾ॒ತವೇ॑ದಸಂ॒ ವಿಪ್ರಂ॒ ನ ಜಾ॒ತವೇ॑ದಸಂ । ಯ ಊ॒ರ್ಧ್ವಯಾ॑ ಸ್ವಧ್ವ॒ರೋ ದೇ॒ವೋ ದೇ॒ವಾಚ್ಯಾ॑ ಕೃ॒ಪಾ । ಘೃ॒ತಸ್ಯ॒ ವಿಭ್ರಾ॑ಷ್ಟಿ॒ಮನು॑ ವಷ್ಟಿ ಶೋ॒ಚಿಷಾ॒ಜುಹ್ವಾ॑ನಸ್ಯ ಸ॒ರ್ಪಿಷಃ॑ ॥
अ॒ग्निं होता॑रं मन्ये॒ दास्वं॑तं॒ वसुं॑ सू॒नुं सह॑सो जा॒तवे॑दसं॒ विप्रं॒ न जा॒तवे॑दसं । य ऊ॒र्ध्वया॑ स्वध्व॒रो दे॒वो दे॒वाच्या॑ कृ॒पा । घृ॒तस्य॒ विभ्रा॑ष्टि॒मनु॑ वष्टि शो॒चिषा॒जुह्वा॑नस्य स॒र्पिषः॑ ॥
ಯಜಿ॑ಷ್ಠಂ ತ್ವಾ॒ ಯಜ॑ಮಾನಾ ಹುವೇಮ॒ ಜ್ಯೇಷ್ಠ॒ಮಂಗಿ॑ರಸಾಂ ವಿಪ್ರ॒ ಮನ್ಮ॑ಭಿ॒ರ್ವಿಪ್ರೇ॑ಭಿಃ ಶುಕ್ರ॒ ಮನ್ಮ॑ಭಿಃ । ಪರಿ॑ಜ್ಮಾನಮಿವ॒ ದ್ಯಾಂ ಹೋತಾ॑ರಂ ಚರ್ಷಣೀ॒ನಾಂ । ಶೋ॒ಚಿಷ್ಕೇ॑ಶಂ॒ ವೃಷ॑ಣಂ॒ ಯಮಿ॒ಮಾ ವಿಶಃ॒ ಪ್ರಾವಂ॑ತು ಜೂ॒ತಯೇ॒ ವಿಶಃ॑ ॥
यजि॑ष्ठं त्वा॒ यज॑माना हुवेम॒ ज्येष्ठ॒मंगि॑रसां विप्र॒ मन्म॑भि॒र्विप्रे॑भिः शुक्र॒ मन्म॑भिः । परि॑ज्मानमिव॒ द्यां होता॑रं चर्षणी॒नां । शो॒चिष्के॑शं॒ वृष॑णं॒ यमि॒मा विशः॒ प्रावं॑तु जू॒तये॒ विशः॑ ॥
ಸ ಹಿ ಪು॒ರೂ ಚಿ॒ದೋಜ॑ಸಾ ವಿ॒ರುಕ್ಮ॑ತಾ॒ ದೀದ್ಯಾ॑ನೋ॒ ಭವ॑ತಿ ದ್ರುಹಂತ॒ರಃ ಪ॑ರ॒ಶುರ್ನ ದ್ರು॑ಹಂತ॒ರಃ । ವೀ॒ಳು ಚಿ॒ದ್ಯಸ್ಯ॒ ಸಮೃ॑ತೌ॒ ಶ್ರುವ॒ದ್ವನೇ॑ವ॒ ಯತ್ಸ್ಥಿ॒ರಂ । ನಿಷ್ಷಹ॑ಮಾಣೋ ಯಮತೇ॒ ನಾಯ॑ತೇ ಧನ್ವಾ॒ಸಹಾ॒ ನಾಯ॑ತೇ ॥
स हि पु॒रू चि॒दोज॑सा वि॒रुक्म॑ता॒ दीद्या॑नो॒ भव॑ति द्रुहंत॒रः प॑र॒शुर्न द्रु॑हंत॒रः । वी॒ळु चि॒द्यस्य॒ समृ॑तौ॒ श्रुव॒द्वने॑व॒ यत्स्थि॒रं । निष्षह॑माणो यमते॒ नाय॑ते धन्वा॒सहा॒ नाय॑ते ॥
ದೃ॒ಳ್ಹಾ ಚಿ॑ದಸ್ಮಾ॒ ಅನು॑ ದು॒ರ್ಯಥಾ॑ ವಿ॒ದೇ ತೇಜಿ॑ಷ್ಠಾಭಿರ॒ರಣಿ॑ಭಿರ್ದಾ॒ಷ್ಟ್ಯವ॑ಸೇ॒ಽಗ್ನಯೇ॑ ದಾ॒ಷ್ಟ್ಯವ॑ಸೇ । ಪ್ರ ಯಃ ಪು॒ರೂಣಿ॒ ಗಾಹ॑ತೇ॒ ತಕ್ಷ॒ದ್ವನೇ॑ವ ಶೋ॒ಚಿಷಾ॑ । ಸ್ಥಿ॒ರಾ ಚಿ॒ದನ್ನಾ॒ ನಿ ರಿ॑ಣಾ॒ತ್ಯೋಜ॑ಸಾ॒ ನಿ ಸ್ಥಿ॒ರಾಣಿ॑ ಚಿ॒ದೋಜ॑ಸಾ ॥
दृ॒ळ्हा चि॑दस्मा॒ अनु॑ दु॒र्यथा॑ वि॒दे तेजि॑ष्ठाभिर॒रणि॑भिर्दा॒ष्ट्यव॑से॒ऽग्नये॑ दा॒ष्ट्यव॑से । प्र यः पु॒रूणि॒ गाह॑ते॒ तक्ष॒द्वने॑व शो॒चिषा॑ । स्थि॒रा चि॒दन्ना॒ नि रि॑णा॒त्योज॑सा॒ नि स्थि॒राणि॑ चि॒दोज॑सा ॥
ತಮ॑ಸ್ಯ ಪೃ॒ಕ್ಷಮುಪ॑ರಾಸು ಧೀಮಹಿ॒ ನಕ್ತಂ॒ ಯಃ ಸು॒ದರ್ಶ॑ತರೋ॒ ದಿವಾ॑ತರಾ॒ದಪ್ರಾ॑ಯುಷೇ॒ ದಿವಾ॑ತರಾತ್ । ಆದ॒ಸ್ಯಾಯು॒ರ್ಗ್ರಭ॑ಣವದ್ವೀ॒ಳು ಶರ್ಮ॒ ನ ಸೂ॒ನವೇ॑ । ಭ॒ಕ್ತಮಭ॑ಕ್ತ॒ಮವೋ॒ ವ್ಯಂತೋ॑ ಅ॒ಜರಾ॑ ಅ॒ಗ್ನಯೋ॒ ವ್ಯಂತೋ॑ ಅ॒ಜರಾಃ॑ ॥
तम॑स्य पृ॒क्षमुप॑रासु धीमहि॒ नक्तं॒ यः सु॒दर्श॑तरो॒ दिवा॑तरा॒दप्रा॑युषे॒ दिवा॑तरात् । आद॒स्यायु॒र्ग्रभ॑णवद्वी॒ळु शर्म॒ न सू॒नवे॑ । भ॒क्तमभ॑क्त॒मवो॒ व्यंतो॑ अ॒जरा॑ अ॒ग्नयो॒ व्यंतो॑ अ॒जराः॑ ॥
ಸ ಹಿ ಶರ್ಧೋ॒ ನ ಮಾರು॑ತಂ ತುವಿ॒ಷ್ವಣಿ॒ರಪ್ನ॑ಸ್ವತೀಷೂ॒ರ್ವರಾ॑ಸ್ವಿ॒ಷ್ಟನಿ॒ರಾರ್ತ॑ನಾಸ್ವಿ॒ಷ್ಟನಿಃ॑ । ಆದ॑ದ್ಧ॒ವ್ಯಾನ್ಯಾ॑ದ॒ದಿರ್ಯ॒ಜ್ಞಸ್ಯ॑ ಕೇ॒ತುರ॒ರ್ಹಣಾ॑ । ಅಧ॑ ಸ್ಮಾಸ್ಯ॒ ಹರ್ಷ॑ತೋ॒ ಹೃಷೀ॑ವತೋ॒ ವಿಶ್ವೇ॑ ಜುಷಂತ॒ ಪಂಥಾಂ॒ ನರಃ॑ ಶು॒ಭೇ ನ ಪಂಥಾಂ॑ ॥
स हि शर्धो॒ न मारु॑तं तुवि॒ष्वणि॒रप्न॑स्वतीषू॒र्वरा॑स्वि॒ष्टनि॒रार्त॑नास्वि॒ष्टनिः॑ । आद॑द्ध॒व्यान्या॑द॒दिर्य॒ज्ञस्य॑ के॒तुर॒र्हणा॑ । अध॑ स्मास्य॒ हर्ष॑तो॒ हृषी॑वतो॒ विश्वे॑ जुषंत॒ पंथां॒ नरः॑ शु॒भे न पंथां॑ ॥
ದ್ವಿ॒ತಾ ಯದೀಂ॑ ಕೀ॒ಸ್ತಾಸೋ॑ ಅ॒ಭಿದ್ಯ॑ವೋ ನಮ॒ಸ್ಯಂತ॑ ಉಪ॒ವೋಚಂ॑ತ॒ ಭೃಗ॑ವೋ ಮ॒ಥ್ನಂತೋ॑ ದಾ॒ಶಾ ಭೃಗ॑ವಃ । ಅ॒ಗ್ನಿರೀ॑ಶೇ॒ ವಸೂ॑ನಾಂ॒ ಶುಚಿ॒ರ್ಯೋ ಧ॒ರ್ಣಿರೇ॑ಷಾಂ । ಪ್ರಿ॒ಯಾಁ ಅ॑ಪಿ॒ಧೀಁರ್ವ॑ನಿಷೀಷ್ಟ॒ ಮೇಧಿ॑ರ॒ ಆ ವ॑ನಿಷೀಷ್ಟ॒ ಮೇಧಿ॑ರಃ ॥
द्वि॒ता यदीं॑ की॒स्तासो॑ अ॒भिद्य॑वो नम॒स्यंत॑ उप॒वोचं॑त॒ भृग॑वो म॒थ्नंतो॑ दा॒शा भृग॑वः । अ॒ग्निरी॑शे॒ वसू॑नां॒ शुचि॒र्यो ध॒र्णिरे॑षां । प्रि॒याँ अ॑पि॒धीँर्व॑निषीष्ट॒ मेधि॑र॒ आ व॑निषीष्ट॒ मेधि॑रः ॥
ವಿಶ್ವಾ॑ಸಾಂ ತ್ವಾ ವಿ॒ಶಾಂ ಪತಿಂ॑ ಹವಾಮಹೇ॒ ಸರ್ವಾ॑ಸಾಂ ಸಮಾ॒ನಂ ದಂಪ॑ತಿಂ ಭು॒ಜೇ ಸ॒ತ್ಯಗಿ॑ರ್ವಾಹಸಂ ಭು॒ಜೇ । ಅತಿ॑ಥಿಂ॒ ಮಾನು॑ಷಾಣಾಂ ಪಿ॒ತುರ್ನ ಯಸ್ಯಾ॑ಸ॒ಯಾ । ಅ॒ಮೀ ಚ॒ ವಿಶ್ವೇ॑ ಅ॒ಮೃತಾ॑ಸ॒ ಆ ವಯೋ॑ ಹ॒ವ್ಯಾ ದೇ॒ವೇಷ್ವಾ ವಯಃ॑ ॥
विश्वा॑सां त्वा वि॒शां पतिं॑ हवामहे॒ सर्वा॑सां समा॒नं दंप॑तिं भु॒जे स॒त्यगि॑र्वाहसं भु॒जे । अति॑थिं॒ मानु॑षाणां पि॒तुर्न यस्या॑स॒या । अ॒मी च॒ विश्वे॑ अ॒मृता॑स॒ आ वयो॑ ह॒व्या दे॒वेष्वा वयः॑ ॥
ತ್ವಮ॑ಗ್ನೇ॒ ಸಹ॑ಸಾ॒ ಸಹಂ॑ತಮಃ ಶು॒ಷ್ಮಿಂತ॑ಮೋ ಜಾಯಸೇ ದೇ॒ವತಾ॑ತಯೇ ರ॒ಯಿರ್ನ ದೇ॒ವತಾ॑ತಯೇ । ಶು॒ಷ್ಮಿಂತ॑ಮೋ॒ ಹಿ ತೇ॒ ಮದೋ॑ ದ್ಯು॒ಮ್ನಿಂತ॑ಮ ಉ॒ತ ಕ್ರತುಃ॑ । ಅಧ॑ ಸ್ಮಾ ತೇ॒ ಪರಿ॑ ಚರಂತ್ಯಜರ ಶ್ರುಷ್ಟೀ॒ವಾನೋ॒ ನಾಜ॑ರ ॥
त्वम॑ग्ने॒ सह॑सा॒ सहं॑तमः शु॒ष्मिंत॑मो जायसे दे॒वता॑तये र॒यिर्न दे॒वता॑तये । शु॒ष्मिंत॑मो॒ हि ते॒ मदो॑ द्यु॒म्निंत॑म उ॒त क्रतुः॑ । अध॑ स्मा ते॒ परि॑ चरंत्यजर श्रुष्टी॒वानो॒ नाज॑र ॥
ಪ್ರ ವೋ॑ ಮ॒ಹೇ ಸಹ॑ಸಾ॒ ಸಹ॑ಸ್ವತ ಉಷ॒ರ್ಬುಧೇ॑ ಪಶು॒ಷೇ ನಾಗ್ನಯೇ॒ ಸ್ತೋಮೋ॑ ಬಭೂತ್ವ॒ಗ್ನಯೇ॑ । ಪ್ರತಿ॒ ಯದೀಂ॑ ಹ॒ವಿಷ್ಮಾ॒ನ್ವಿಶ್ವಾ॑ಸು॒ ಕ್ಷಾಸು॒ ಜೋಗು॑ವೇ । ಅಗ್ರೇ॑ ರೇ॒ಭೋ ನ ಜ॑ರತ ಋಷೂ॒ಣಾಂ ಜೂರ್ಣಿ॒ರ್ಹೋತ॑ ಋಷೂ॒ಣಾಂ ॥
प्र वो॑ म॒हे सह॑सा॒ सह॑स्वत उष॒र्बुधे॑ पशु॒षे नाग्नये॒ स्तोमो॑ बभूत्व॒ग्नये॑ । प्रति॒ यदीं॑ ह॒विष्मा॒न्विश्वा॑सु॒ क्षासु॒ जोगु॑वे । अग्रे॑ रे॒भो न ज॑रत ऋषू॒णां जूर्णि॒र्होत॑ ऋषू॒णां ॥
ಸ ನೋ॒ ನೇದಿ॑ಷ್ಠಂ॒ ದದೃ॑ಶಾನ॒ ಆ ಭ॒ರಾಗ್ನೇ॑ ದೇ॒ವೇಭಿಃ॒ ಸಚ॑ನಾಃ ಸುಚೇ॒ತುನಾ॑ ಮ॒ಹೋ ರಾ॒ಯಃ ಸು॑ಚೇ॒ತುನಾ॑ । ಮಹಿ॑ ಶವಿಷ್ಠ ನಸ್ಕೃಧಿ ಸಂ॒ಚಕ್ಷೇ॑ ಭು॒ಜೇ ಅ॒ಸ್ಯೈ । ಮಹಿ॑ ಸ್ತೋ॒ತೃಭ್ಯೋ॑ ಮಘವನ್ತ್ಸು॒ವೀರ್ಯಂ॒ ಮಥೀ॑ರು॒ಗ್ರೋ ನ ಶವ॑ಸಾ ॥
स नो॒ नेदि॑ष्ठं॒ ददृ॑शान॒ आ भ॒राग्ने॑ दे॒वेभिः॒ सच॑नाः सुचे॒तुना॑ म॒हो रा॒यः सु॑चे॒तुना॑ । महि॑ शविष्ठ नस्कृधि सं॒चक्षे॑ भु॒जे अ॒स्यै । महि॑ स्तो॒तृभ्यो॑ मघवन्त्सु॒वीर्यं॒ मथी॑रु॒ग्रो न शव॑सा ॥