ಈ ಸೂಕ್ತಕ್ಕೆ ಅಡ್ಮಿನ್‌ನಲ್ಲಿ ಕನ್ನಡ ಅಧ್ಯಯನ ಮಾರ್ಗದರ್ಶಿ (Study Guide) ಇನ್ನೂ ರಚನೆಯಾಗಿಲ್ಲ. ಅಡ್ಮಿನ್‌ನಲ್ಲಿ Generate Study Guides ಮೂಲಕ ಕನ್ನಡ ಭಾಷೆಯನ್ನು ಆಯ್ಕೆಮಾಡಿ ರಚಿಸಬಹುದು.
ಉ॒ಷಾ ಉ॒ಚ್ಛಂತೀ॑ ಸಮಿಧಾ॒ನೇ ಅ॒ಗ್ನಾ ಉ॒ದ್ಯನ್ತ್ಸೂರ್ಯ॑ ಉರ್ವಿ॒ಯಾ ಜ್ಯೋತಿ॑ರಶ್ರೇತ್ । ದೇ॒ವೋ ನೋ॒ ಅತ್ರ॑ ಸವಿ॒ತಾ ನ್ವರ್ಥಂ॒ ಪ್ರಾಸಾ॑ವೀದ್ದ್ವಿ॒ಪತ್ಪ್ರ ಚತು॑ಷ್ಪದಿ॒ತ್ಯೈ ॥
उ॒षा उ॒च्छंती॑ समिधा॒ने अ॒ग्ना उ॒द्यन्त्सूर्य॑ उर्वि॒या ज्योति॑रश्रेत् । दे॒वो नो॒ अत्र॑ सवि॒ता न्वर्थं॒ प्रासा॑वीद्द्वि॒पत्प्र चतु॑ष्पदि॒त्यै ॥
ಅಮಿ॑ನತೀ॒ ದೈವ್ಯಾ॑ನಿ ವ್ರ॒ತಾನಿ॑ ಪ್ರಮಿನ॒ತೀ ಮ॑ನು॒ಷ್ಯಾ॑ ಯು॒ಗಾನಿ॑ । ಈ॒ಯುಷೀ॑ಣಾಮುಪ॒ಮಾ ಶಶ್ವ॑ತೀನಾಮಾಯತೀ॒ನಾಂ ಪ್ರ॑ಥ॒ಮೋಷಾ ವ್ಯ॑ದ್ಯೌತ್ ॥
अमि॑नती॒ दैव्या॑नि व्र॒तानि॑ प्रमिन॒ती म॑नु॒ष्या॑ यु॒गानि॑ । ई॒युषी॑णामुप॒मा शश्व॑तीनामायती॒नां प्र॑थ॒मोषा व्य॑द्यौत् ॥
ಏ॒ಷಾ ದಿ॒ವೋ ದು॑ಹಿ॒ತಾ ಪ್ರತ್ಯ॑ದರ್ಶಿ॒ ಜ್ಯೋತಿ॒ರ್ವಸಾ॑ನಾ ಸಮ॒ನಾ ಪು॒ರಸ್ತಾ॑ತ್ । ಋ॒ತಸ್ಯ॒ ಪಂಥಾ॒ಮನ್ವೇ॑ತಿ ಸಾ॒ಧು ಪ್ರ॑ಜಾನ॒ತೀವ॒ ನ ದಿಶೋ॑ ಮಿನಾತಿ ॥
ए॒षा दि॒वो दु॑हि॒ता प्रत्य॑दर्शि॒ ज्योति॒र्वसा॑ना सम॒ना पु॒रस्ता॑त् । ऋ॒तस्य॒ पंथा॒मन्वे॑ति सा॒धु प्र॑जान॒तीव॒ न दिशो॑ मिनाति ॥
ಉಪೋ॑ ಅದರ್ಶಿ ಶುಂ॒ಧ್ಯುವೋ॒ ನ ವಕ್ಷೋ॑ ನೋ॒ಧಾ ಇ॑ವಾ॒ವಿರ॑ಕೃತ ಪ್ರಿ॒ಯಾಣಿ॑ । ಅ॒ದ್ಮ॒ಸನ್ನ ಸ॑ಸ॒ತೋ ಬೋ॒ಧಯಂ॑ತೀ ಶಶ್ವತ್ತ॒ಮಾಗಾ॒ತ್ಪುನ॑ರೇ॒ಯುಷೀ॑ಣಾಂ ॥
उपो॑ अदर्शि शुं॒ध्युवो॒ न वक्षो॑ नो॒धा इ॑वा॒विर॑कृत प्रि॒याणि॑ । अ॒द्म॒सन्न स॑स॒तो बो॒धयं॑ती शश्वत्त॒मागा॒त्पुन॑रे॒युषी॑णां ॥
ಪೂರ್ವೇ॒ ಅರ್ಧೇ॒ ರಜ॑ಸೋ ಅ॒ಪ್ತ್ಯಸ್ಯ॒ ಗವಾಂ॒ ಜನಿ॑ತ್ರ್ಯಕೃತ॒ ಪ್ರ ಕೇ॒ತುಂ । ವ್ಯು॑ ಪ್ರಥತೇ ವಿತ॒ರಂ ವರೀ॑ಯ॒ ಓಭಾ ಪೃ॒ಣಂತೀ॑ ಪಿ॒ತ್ರೋರು॒ಪಸ್ಥಾ॑ ॥
पूर्वे॒ अर्धे॒ रज॑सो अ॒प्त्यस्य॒ गवां॒ जनि॑त्र्यकृत॒ प्र के॒तुं । व्यु॑ प्रथते वित॒रं वरी॑य॒ ओभा पृ॒णंती॑ पि॒त्रोरु॒पस्था॑ ॥
ಏ॒ವೇದೇ॒ಷಾ ಪು॑ರು॒ತಮಾ॑ ದೃ॒ಶೇ ಕಂ ನಾಜಾ॑ಮಿಂ॒ ನ ಪರಿ॑ ವೃಣಕ್ತಿ ಜಾ॒ಮಿಂ । ಅ॒ರೇ॒ಪಸಾ॑ ತ॒ನ್ವಾ॒೩॒॑ ಶಾಶ॑ದಾನಾ॒ ನಾರ್ಭಾ॒ದೀಷ॑ತೇ॒ ನ ಮ॒ಹೋ ವಿ॑ಭಾ॒ತೀ ॥
ए॒वेदे॒षा पु॑रु॒तमा॑ दृ॒शे कं नाजा॑मिं॒ न परि॑ वृणक्ति जा॒मिं । अ॒रे॒पसा॑ त॒न्वा॒३॒॑ शाश॑दाना॒ नार्भा॒दीष॑ते॒ न म॒हो वि॑भा॒ती ॥
ಅ॒ಭ್ರಾ॒ತೇವ॑ ಪುಂ॒ಸ ಏ॑ತಿ ಪ್ರತೀ॒ಚೀ ಗ॑ರ್ತಾ॒ರುಗಿ॑ವ ಸ॒ನಯೇ॒ ಧನಾ॑ನಾಂ । ಜಾ॒ಯೇವ॒ ಪತ್ಯ॑ ಉಶ॒ತೀ ಸು॒ವಾಸಾ॑ ಉ॒ಷಾ ಹ॒ಸ್ರೇವ॒ ನಿ ರಿ॑ಣೀತೇ॒ ಅಪ್ಸಃ॑ ॥
अ॒भ्रा॒तेव॑ पुं॒स ए॑ति प्रती॒ची ग॑र्ता॒रुगि॑व स॒नये॒ धना॑नां । जा॒येव॒ पत्य॑ उश॒ती सु॒वासा॑ उ॒षा ह॒स्रेव॒ नि रि॑णीते॒ अप्सः॑ ॥
ಸ್ವಸಾ॒ ಸ್ವಸ್ರೇ॒ ಜ್ಯಾಯ॑ಸ್ಯೈ॒ ಯೋನಿ॑ಮಾರೈ॒ಗಪೈ॑ತ್ಯಸ್ಯಾಃ ಪ್ರತಿ॒ಚಕ್ಷ್ಯೇ॑ವ । ವ್ಯು॒ಚ್ಛಂತೀ॑ ರ॒ಶ್ಮಿಭಿಃ॒ ಸೂರ್ಯ॑ಸ್ಯಾಂ॒ಜ್ಯಂ॑ಕ್ತೇ ಸಮನ॒ಗಾ ಇ॑ವ॒ ವ್ರಾಃ ॥
स्वसा॒ स्वस्रे॒ ज्याय॑स्यै॒ योनि॑मारै॒गपै॑त्यस्याः प्रति॒चक्ष्ये॑व । व्यु॒च्छंती॑ र॒श्मिभिः॒ सूर्य॑स्यां॒ज्यं॑क्ते समन॒गा इ॑व॒ व्राः ॥
ಆ॒ಸಾಂ ಪೂರ್ವಾ॑ಸಾ॒ಮಹ॑ಸು॒ ಸ್ವಸೄ॑ಣಾ॒ಮಪ॑ರಾ॒ ಪೂರ್ವಾ॑ಮ॒ಭ್ಯೇ॑ತಿ ಪ॒ಶ್ಚಾತ್ । ತಾಃ ಪ್ರ॑ತ್ನ॒ವನ್ನವ್ಯ॑ಸೀರ್ನೂ॒ನಮ॒ಸ್ಮೇ ರೇ॒ವದು॑ಚ್ಛಂತು ಸು॒ದಿನಾ॑ ಉ॒ಷಾಸಃ॑ ॥
आ॒सां पूर्वा॑सा॒मह॑सु॒ स्वसॄ॑णा॒मप॑रा॒ पूर्वा॑म॒भ्ये॑ति प॒श्चात् । ताः प्र॑त्न॒वन्नव्य॑सीर्नू॒नम॒स्मे रे॒वदु॑च्छंतु सु॒दिना॑ उ॒षासः॑ ॥
ಪ್ರ ಬೋ॑ಧಯೋಷಃ ಪೃಣ॒ತೋ ಮ॑ಘೋ॒ನ್ಯಬು॑ಧ್ಯಮಾನಾಃ ಪ॒ಣಯಃ॑ ಸಸಂತು । ರೇ॒ವದು॑ಚ್ಛ ಮ॒ಘವ॑ದ್ಭ್ಯೋ ಮಘೋನಿ ರೇ॒ವತ್ಸ್ತೋ॒ತ್ರೇ ಸೂ॑ನೃತೇ ಜಾ॒ರಯಂ॑ತೀ ॥
प्र बो॑धयोषः पृण॒तो म॑घो॒न्यबु॑ध्यमानाः प॒णयः॑ ससंतु । रे॒वदु॑च्छ म॒घव॑द्भ्यो मघोनि रे॒वत्स्तो॒त्रे सू॑नृते जा॒रयं॑ती ॥
ಅವೇ॒ಯಮ॑ಶ್ವೈದ್ಯುವ॒ತಿಃ ಪು॒ರಸ್ತಾ॑ದ್ಯುಂ॒ಕ್ತೇ ಗವಾ॑ಮರು॒ಣಾನಾ॒ಮನೀ॑ಕಂ । ವಿ ನೂ॒ನಮು॑ಚ್ಛಾ॒ದಸ॑ತಿ॒ ಪ್ರ ಕೇ॒ತುರ್ಗೃ॒ಹಂಗೃ॑ಹ॒ಮುಪ॑ ತಿಷ್ಠಾತೇ ಅ॒ಗ್ನಿಃ ॥
अवे॒यम॑श्वैद्युव॒तिः पु॒रस्ता॑द्युं॒क्ते गवा॑मरु॒णाना॒मनी॑कं । वि नू॒नमु॑च्छा॒दस॑ति॒ प्र के॒तुर्गृ॒हंगृ॑ह॒मुप॑ तिष्ठाते अ॒ग्निः ॥
ಉತ್ತೇ॒ ವಯ॑ಶ್ಚಿದ್ವಸ॒ತೇರ॑ಪಪ್ತ॒ನ್ನರ॑ಶ್ಚ॒ ಯೇ ಪಿ॑ತು॒ಭಾಜೋ॒ ವ್ಯು॑ಷ್ಟೌ । ಅ॒ಮಾ ಸ॒ತೇ ವ॑ಹಸಿ॒ ಭೂರಿ॑ ವಾ॒ಮಮುಷೋ॑ ದೇವಿ ದಾ॒ಶುಷೇ॒ ಮರ್ತ್ಯಾ॑ಯ ॥
उत्ते॒ वय॑श्चिद्वस॒तेर॑पप्त॒न्नर॑श्च॒ ये पि॑तु॒भाजो॒ व्यु॑ष्टौ । अ॒मा स॒ते व॑हसि॒ भूरि॑ वा॒ममुषो॑ देवि दा॒शुषे॒ मर्त्या॑य ॥
ಅಸ್ತೋ॑ಢ್ವಂ ಸ್ತೋಮ್ಯಾ॒ ಬ್ರಹ್ಮ॑ಣಾ॒ ಮೇಽವೀ॑ವೃಧಧ್ವಮುಶ॒ತೀರು॑ಷಾಸಃ । ಯು॒ಷ್ಮಾಕಂ॑ ದೇವೀ॒ರವ॑ಸಾ ಸನೇಮ ಸಹ॒ಸ್ರಿಣಂ॑ ಚ ಶ॒ತಿನಂ॑ ಚ॒ ವಾಜಂ॑ ॥
अस्तो॑ढ्वं स्तोम्या॒ ब्रह्म॑णा॒ मेऽवी॑वृधध्वमुश॒तीरु॑षासः । यु॒ष्माकं॑ देवी॒रव॑सा सनेम सह॒स्रिणं॑ च श॒तिनं॑ च॒ वाजं॑ ॥