ಈ ಸೂಕ್ತಕ್ಕೆ ಅಡ್ಮಿನ್‌ನಲ್ಲಿ ಕನ್ನಡ ಅಧ್ಯಯನ ಮಾರ್ಗದರ್ಶಿ (Study Guide) ಇನ್ನೂ ರಚನೆಯಾಗಿಲ್ಲ. ಅಡ್ಮಿನ್‌ನಲ್ಲಿ Generate Study Guides ಮೂಲಕ ಕನ್ನಡ ಭಾಷೆಯನ್ನು ಆಯ್ಕೆಮಾಡಿ ರಚಿಸಬಹುದು.
ಪೃ॒ಥೂ ರಥೋ॒ ದಕ್ಷಿ॑ಣಾಯಾ ಅಯೋ॒ಜ್ಯೈನಂ॑ ದೇ॒ವಾಸೋ॑ ಅ॒ಮೃತಾ॑ಸೋ ಅಸ್ಥುಃ । ಕೃ॒ಷ್ಣಾದುದ॑ಸ್ಥಾದ॒ರ್ಯಾ॒೩॒॑ ವಿಹಾ॑ಯಾ॒ಶ್ಚಿಕಿ॑ತ್ಸಂತೀ॒ ಮಾನು॑ಷಾಯ॒ ಕ್ಷಯಾ॑ಯ ॥
पृ॒थू रथो॒ दक्षि॑णाया अयो॒ज्यैनं॑ दे॒वासो॑ अ॒मृता॑सो अस्थुः । कृ॒ष्णादुद॑स्थाद॒र्या॒३॒॑ विहा॑या॒श्चिकि॑त्संती॒ मानु॑षाय॒ क्षया॑य ॥
ಪೂರ್ವಾ॒ ವಿಶ್ವ॑ಸ್ಮಾ॒ದ್ಭುವ॑ನಾದಬೋಧಿ॒ ಜಯಂ॑ತೀ॒ ವಾಜಂ॑ ಬೃಹ॒ತೀ ಸನು॑ತ್ರೀ । ಉ॒ಚ್ಚಾ ವ್ಯ॑ಖ್ಯದ್ಯುವ॒ತಿಃ ಪು॑ನ॒ರ್ಭೂರೋಷಾ ಅ॑ಗನ್ಪ್ರಥ॒ಮಾ ಪೂ॒ರ್ವಹೂ॑ತೌ ॥
पूर्वा॒ विश्व॑स्मा॒द्भुव॑नादबोधि॒ जयं॑ती॒ वाजं॑ बृह॒ती सनु॑त्री । उ॒च्चा व्य॑ख्यद्युव॒तिः पु॑न॒र्भूरोषा अ॑गन्प्रथ॒मा पू॒र्वहू॑तौ ॥
ಯದ॒ದ್ಯ ಭಾ॒ಗಂ ವಿ॒ಭಜಾ॑ಸಿ॒ ನೃಭ್ಯ॒ ಉಷೋ॑ ದೇವಿ ಮರ್ತ್ಯ॒ತ್ರಾ ಸು॑ಜಾತೇ । ದೇ॒ವೋ ನೋ॒ ಅತ್ರ॑ ಸವಿ॒ತಾ ದಮೂ॑ನಾ॒ ಅನಾ॑ಗಸೋ ವೋಚತಿ॒ ಸೂರ್ಯಾ॑ಯ ॥
यद॒द्य भा॒गं वि॒भजा॑सि॒ नृभ्य॒ उषो॑ देवि मर्त्य॒त्रा सु॑जाते । दे॒वो नो॒ अत्र॑ सवि॒ता दमू॑ना॒ अना॑गसो वोचति॒ सूर्या॑य ॥
ಗೃ॒ಹಂಗೃ॑ಹಮಹ॒ನಾ ಯಾ॒ತ್ಯಚ್ಛಾ॑ ದಿ॒ವೇದಿ॑ವೇ॒ ಅಧಿ॒ ನಾಮಾ॒ ದಧಾ॑ನಾ । ಸಿಷಾ॑ಸಂತೀ ದ್ಯೋತ॒ನಾ ಶಶ್ವ॒ದಾಗಾ॒ದಗ್ರ॑ಮಗ್ರ॒ಮಿದ್ಭ॑ಜತೇ॒ ವಸೂ॑ನಾಂ ॥
गृ॒हंगृ॑हमह॒ना या॒त्यच्छा॑ दि॒वेदि॑वे॒ अधि॒ नामा॒ दधा॑ना । सिषा॑संती द्योत॒ना शश्व॒दागा॒दग्र॑मग्र॒मिद्भ॑जते॒ वसू॑नां ॥
ಭಗ॑ಸ್ಯ॒ ಸ್ವಸಾ॒ ವರು॑ಣಸ್ಯ ಜಾ॒ಮಿರುಷಃ॑ ಸೂನೃತೇ ಪ್ರಥ॒ಮಾ ಜ॑ರಸ್ವ । ಪ॒ಶ್ಚಾ ಸ ದ॑ಘ್ಯಾ॒ ಯೋ ಅ॒ಘಸ್ಯ॑ ಧಾ॒ತಾ ಜಯೇ॑ಮ॒ ತಂ ದಕ್ಷಿ॑ಣಯಾ॒ ರಥೇ॑ನ ॥
भग॑स्य॒ स्वसा॒ वरु॑णस्य जा॒मिरुषः॑ सूनृते प्रथ॒मा ज॑रस्व । प॒श्चा स द॑घ्या॒ यो अ॒घस्य॑ धा॒ता जये॑म॒ तं दक्षि॑णया॒ रथे॑न ॥
ಉದೀ॑ರತಾಂ ಸೂ॒ನೃತಾ॒ ಉತ್ಪುರಂ॑ಧೀ॒ರುದ॒ಗ್ನಯಃ॑ ಶುಶುಚಾ॒ನಾಸೋ॑ ಅಸ್ಥುಃ । ಸ್ಪಾ॒ರ್ಹಾ ವಸೂ॑ನಿ॒ ತಮ॒ಸಾಪ॑ಗೂಳ್ಹಾ॒ವಿಷ್ಕೃ॑ಣ್ವಂತ್ಯು॒ಷಸೋ॑ ವಿಭಾ॒ತೀಃ ॥
उदी॑रतां सू॒नृता॒ उत्पुरं॑धी॒रुद॒ग्नयः॑ शुशुचा॒नासो॑ अस्थुः । स्पा॒र्हा वसू॑नि॒ तम॒साप॑गूळ्हा॒विष्कृ॑ण्वंत्यु॒षसो॑ विभा॒तीः ॥
ಅಪಾ॒ನ್ಯದೇತ್ಯ॒ಭ್ಯ೧॒॑ನ್ಯದೇ॑ತಿ॒ ವಿಷು॑ರೂಪೇ॒ ಅಹ॑ನೀ॒ ಸಂ ಚ॑ರೇತೇ । ಪ॒ರಿ॒ಕ್ಷಿತೋ॒ಸ್ತಮೋ॑ ಅ॒ನ್ಯಾ ಗುಹಾ॑ಕ॒ರದ್ಯೌ॑ದು॒ಷಾಃ ಶೋಶು॑ಚತಾ॒ ರಥೇ॑ನ ॥
अपा॒न्यदेत्य॒भ्य१॒॑न्यदे॑ति॒ विषु॑रूपे॒ अह॑नी॒ सं च॑रेते । प॒रि॒क्षितो॒स्तमो॑ अ॒न्या गुहा॑क॒रद्यौ॑दु॒षाः शोशु॑चता॒ रथे॑न ॥
ಸ॒ದೃಶೀ॑ರ॒ದ್ಯ ಸ॒ದೃಶೀ॒ರಿದು॒ ಶ್ವೋ ದೀ॒ರ್ಘಂ ಸ॑ಚಂತೇ॒ ವರು॑ಣಸ್ಯ॒ ಧಾಮ॑ । ಅ॒ನ॒ವ॒ದ್ಯಾಸ್ತ್ರಿಂ॒ಶತಂ॒ ಯೋಜ॑ನಾ॒ನ್ಯೇಕೈ॑ಕಾ॒ ಕ್ರತುಂ॒ ಪರಿ॑ ಯಂತಿ ಸ॒ದ್ಯಃ ॥
स॒दृशी॑र॒द्य स॒दृशी॒रिदु॒ श्वो दी॒र्घं स॑चंते॒ वरु॑णस्य॒ धाम॑ । अ॒न॒व॒द्यास्त्रिं॒शतं॒ योज॑ना॒न्येकै॑का॒ क्रतुं॒ परि॑ यंति स॒द्यः ॥
ಜಾ॒ನ॒ತ್ಯಹ್ನಃ॑ ಪ್ರಥ॒ಮಸ್ಯ॒ ನಾಮ॑ ಶು॒ಕ್ರಾ ಕೃ॒ಷ್ಣಾದ॑ಜನಿಷ್ಟ ಶ್ವಿತೀ॒ಚೀ । ಋ॒ತಸ್ಯ॒ ಯೋಷಾ॒ ನ ಮಿ॑ನಾತಿ॒ ಧಾಮಾಹ॑ರಹರ್ನಿಷ್ಕೃ॒ತಮಾ॒ಚರಂ॑ತೀ ॥
जा॒न॒त्यह्नः॑ प्रथ॒मस्य॒ नाम॑ शु॒क्रा कृ॒ष्णाद॑जनिष्ट श्विती॒ची । ऋ॒तस्य॒ योषा॒ न मि॑नाति॒ धामाह॑रहर्निष्कृ॒तमा॒चरं॑ती ॥
ಕ॒ನ್ಯೇ॑ವ ತ॒ನ್ವಾ॒೩॒॑ ಶಾಶ॑ದಾನಾಁ॒ ಏಷಿ॑ ದೇವಿ ದೇ॒ವಮಿಯ॑ಕ್ಷಮಾಣಂ । ಸಂ॒ಸ್ಮಯ॑ಮಾನಾ ಯುವ॒ತಿಃ ಪು॒ರಸ್ತಾ॑ದಾ॒ವಿರ್ವಕ್ಷಾಂ॑ಸಿ ಕೃಣುಷೇ ವಿಭಾ॒ತೀ ॥
क॒न्ये॑व त॒न्वा॒३॒॑ शाश॑दानाँ॒ एषि॑ देवि दे॒वमिय॑क्षमाणं । सं॒स्मय॑माना युव॒तिः पु॒रस्ता॑दा॒विर्वक्षां॑सि कृणुषे विभा॒ती ॥
ಸು॒ಸಂ॒ಕಾ॒ಶಾ ಮಾ॒ತೃಮೃ॑ಷ್ಟೇವ॒ ಯೋಷಾ॒ವಿಸ್ತ॒ನ್ವಂ॑ ಕೃಣುಷೇ ದೃ॒ಶೇ ಕಂ । ಭ॒ದ್ರಾ ತ್ವಮು॑ಷೋ ವಿತ॒ರಂ ವ್ಯು॑ಚ್ಛ॒ ನ ತತ್ತೇ॑ ಅ॒ನ್ಯಾ ಉ॒ಷಸೋ॑ ನಶಂತ ॥
सु॒सं॒का॒शा मा॒तृमृ॑ष्टेव॒ योषा॒विस्त॒न्वं॑ कृणुषे दृ॒शे कं । भ॒द्रा त्वमु॑षो वित॒रं व्यु॑च्छ॒ न तत्ते॑ अ॒न्या उ॒षसो॑ नशंत ॥
ಅಶ್ವಾ॑ವತೀ॒ರ್ಗೋಮ॑ತೀರ್ವಿ॒ಶ್ವವಾ॑ರಾ॒ ಯತ॑ಮಾನಾ ರ॒ಶ್ಮಿಭಿಃ॒ ಸೂರ್ಯ॑ಸ್ಯ । ಪರಾ॑ ಚ॒ ಯಂತಿ॒ ಪುನ॒ರಾ ಚ॑ ಯಂತಿ ಭ॒ದ್ರಾ ನಾಮ॒ ವಹ॑ಮಾನಾ ಉ॒ಷಾಸಃ॑ ॥
अश्वा॑वती॒र्गोम॑तीर्वि॒श्ववा॑रा॒ यत॑माना र॒श्मिभिः॒ सूर्य॑स्य । परा॑ च॒ यंति॒ पुन॒रा च॑ यंति भ॒द्रा नाम॒ वह॑माना उ॒षासः॑ ॥
ಋ॒ತಸ್ಯ॑ ರ॒ಶ್ಮಿಮ॑ನು॒ಯಚ್ಛ॑ಮಾನಾ ಭ॒ದ್ರಂಭ॑ದ್ರಂ॒ ಕ್ರತು॑ಮ॒ಸ್ಮಾಸು॑ ಧೇಹಿ । ಉಷೋ॑ ನೋ ಅ॒ದ್ಯ ಸು॒ಹವಾ॒ ವ್ಯು॑ಚ್ಛಾ॒ಸ್ಮಾಸು॒ ರಾಯೋ॑ ಮ॒ಘವ॑ತ್ಸು ಚ ಸ್ಯುಃ ॥
ऋ॒तस्य॑ र॒श्मिम॑नु॒यच्छ॑माना भ॒द्रंभ॑द्रं॒ क्रतु॑म॒स्मासु॑ धेहि । उषो॑ नो अ॒द्य सु॒हवा॒ व्यु॑च्छा॒स्मासु॒ रायो॑ म॒घव॑त्सु च स्युः ॥