ಈ ಸೂಕ್ತಕ್ಕೆ ಅಡ್ಮಿನ್‌ನಲ್ಲಿ ಕನ್ನಡ ಅಧ್ಯಯನ ಮಾರ್ಗದರ್ಶಿ (Study Guide) ಇನ್ನೂ ರಚನೆಯಾಗಿಲ್ಲ. ಅಡ್ಮಿನ್‌ನಲ್ಲಿ Generate Study Guides ಮೂಲಕ ಕನ್ನಡ ಭಾಷೆಯನ್ನು ಆಯ್ಕೆಮಾಡಿ ರಚಿಸಬಹುದು.
ತ॒ತಂ ಮೇ॒ ಅಪ॒ಸ್ತದು॑ ತಾಯತೇ॒ ಪುನಃ॒ ಸ್ವಾದಿ॑ಷ್ಠಾ ಧೀ॒ತಿರು॒ಚಥಾ॑ಯ ಶಸ್ಯತೇ । ಅ॒ಯಂ ಸ॑ಮು॒ದ್ರ ಇ॒ಹ ವಿ॒ಶ್ವದೇ॑ವ್ಯಃ॒ ಸ್ವಾಹಾ॑ಕೃತಸ್ಯ॒ ಸಮು॑ ತೃಪ್ಣುತ ಋಭವಃ ॥
त॒तं मे॒ अप॒स्तदु॑ तायते॒ पुनः॒ स्वादि॑ष्ठा धी॒तिरु॒चथा॑य शस्यते । अ॒यं स॑मु॒द्र इ॒ह वि॒श्वदे॑व्यः॒ स्वाहा॑कृतस्य॒ समु॑ तृप्णुत ऋभवः ॥
ಆ॒ಭೋ॒ಗಯಂ॒ ಪ್ರ ಯದಿ॒ಚ್ಛಂತ॒ ಐತ॒ನಾಪಾ॑ಕಾಃ॒ ಪ್ರಾಂಚೋ॒ ಮಮ॒ ಕೇ ಚಿ॑ದಾ॒ಪಯಃ॑ । ಸೌಧ॑ನ್ವನಾಸಶ್ಚರಿ॒ತಸ್ಯ॑ ಭೂ॒ಮನಾಗ॑ಚ್ಛತ ಸವಿ॒ತುರ್ದಾ॒ಶುಷೋ॑ ಗೃ॒ಹಂ ॥
आ॒भो॒गयं॒ प्र यदि॒च्छंत॒ ऐत॒नापा॑काः॒ प्रांचो॒ मम॒ के चि॑दा॒पयः॑ । सौध॑न्वनासश्चरि॒तस्य॑ भू॒मनाग॑च्छत सवि॒तुर्दा॒शुषो॑ गृ॒हं ॥
ತತ್ಸ॑ವಿ॒ತಾ ವೋ॑ಽಮೃತ॒ತ್ವಮಾಸು॑ವ॒ದಗೋ॑ಹ್ಯಂ॒ ಯಚ್ಛ್ರ॒ವಯಂ॑ತ॒ ಐತ॑ನ । ತ್ಯಂ ಚಿ॑ಚ್ಚಮ॒ಸಮಸು॑ರಸ್ಯ॒ ಭಕ್ಷ॑ಣ॒ಮೇಕಂ॒ ಸಂತ॑ಮಕೃಣುತಾ॒ ಚತು॑ರ್ವಯಂ ॥
तत्स॑वि॒ता वो॑ऽमृत॒त्वमासु॑व॒दगो॑ह्यं॒ यच्छ्र॒वयं॑त॒ ऐत॑न । त्यं चि॑च्चम॒समसु॑रस्य॒ भक्ष॑ण॒मेकं॒ संत॑मकृणुता॒ चतु॑र्वयं ॥
ವಿ॒ಷ್ಟ್ವೀ ಶಮೀ॑ ತರಣಿ॒ತ್ವೇನ॑ ವಾ॒ಘತೋ॒ ಮರ್ತಾ॑ಸಃ॒ ಸಂತೋ॑ ಅಮೃತ॒ತ್ವಮಾ॑ನಶುಃ । ಸೌ॒ಧ॒ನ್ವ॒ನಾ ಋ॒ಭವಃ॒ ಸೂರ॑ಚಕ್ಷಸಃ ಸಂವತ್ಸ॒ರೇ ಸಮ॑ಪೃಚ್ಯಂತ ಧೀ॒ತಿಭಿಃ॑ ॥
वि॒ष्ट्वी शमी॑ तरणि॒त्वेन॑ वा॒घतो॒ मर्ता॑सः॒ संतो॑ अमृत॒त्वमा॑नशुः । सौ॒ध॒न्व॒ना ऋ॒भवः॒ सूर॑चक्षसः संवत्स॒रे सम॑पृच्यंत धी॒तिभिः॑ ॥
ಕ್ಷೇತ್ರ॑ಮಿವ॒ ವಿ ಮ॑ಮು॒ಸ್ತೇಜ॑ನೇನಁ॒ ಏಕಂ॒ ಪಾತ್ರ॑ಮೃ॒ಭವೋ॒ ಜೇಹ॑ಮಾನಂ । ಉಪ॑ಸ್ತುತಾ ಉಪ॒ಮಂ ನಾಧ॑ಮಾನಾ॒ ಅಮ॑ರ್ತ್ಯೇಷು॒ ಶ್ರವ॑ ಇ॒ಚ್ಛಮಾ॑ನಾಃ ॥
क्षेत्र॑मिव॒ वि म॑मु॒स्तेज॑नेनँ॒ एकं॒ पात्र॑मृ॒भवो॒ जेह॑मानं । उप॑स्तुता उप॒मं नाध॑माना॒ अम॑र्त्येषु॒ श्रव॑ इ॒च्छमा॑नाः ॥
ಆ ಮ॑ನೀ॒ಷಾಮಂ॒ತರಿ॑ಕ್ಷಸ್ಯ॒ ನೃಭ್ಯಃ॑ ಸ್ರು॒ಚೇವ॑ ಘೃ॒ತಂ ಜು॑ಹವಾಮ ವಿ॒ದ್ಮನಾ॑ । ತ॒ರ॒ಣಿ॒ತ್ವಾ ಯೇ ಪಿ॒ತುರ॑ಸ್ಯ ಸಶ್ಚಿ॒ರ ಋ॒ಭವೋ॒ ವಾಜ॑ಮರುಹಂದಿ॒ವೋ ರಜಃ॑ ॥
आ म॑नी॒षामं॒तरि॑क्षस्य॒ नृभ्यः॑ स्रु॒चेव॑ घृ॒तं जु॑हवाम वि॒द्मना॑ । त॒र॒णि॒त्वा ये पि॒तुर॑स्य सश्चि॒र ऋ॒भवो॒ वाज॑मरुहंदि॒वो रजः॑ ॥
ಋ॒ಭುರ್ನ॒ ಇಂದ್ರಃ॒ ಶವ॑ಸಾ॒ ನವೀ॑ಯಾನೃ॒ಭುರ್ವಾಜೇ॑ಭಿ॒ರ್ವಸು॑ಭಿ॒ರ್ವಸು॑ರ್ದ॒ದಿಃ । ಯು॒ಷ್ಮಾಕಂ॑ ದೇವಾ॒ ಅವ॒ಸಾಹ॑ನಿ ಪ್ರಿ॒ಯೇ॒೩॒॑ಽಭಿ ತಿ॑ಷ್ಠೇಮ ಪೃತ್ಸು॒ತೀರಸು॑ನ್ವತಾಂ ॥
ऋ॒भुर्न॒ इंद्रः॒ शव॑सा॒ नवी॑यानृ॒भुर्वाजे॑भि॒र्वसु॑भि॒र्वसु॑र्द॒दिः । यु॒ष्माकं॑ देवा॒ अव॒साह॑नि प्रि॒ये॒३॒॑ऽभि ति॑ष्ठेम पृत्सु॒तीरसु॑न्वतां ॥
ನಿಶ್ಚರ್ಮ॑ಣ ಋಭವೋ॒ ಗಾಮ॑ಪಿಂಶತ॒ ಸಂ ವ॒ತ್ಸೇನಾ॑ಸೃಜತಾ ಮಾ॒ತರಂ॒ ಪುನಃ॑ । ಸೌಧ॑ನ್ವನಾಸಃ ಸ್ವಪ॒ಸ್ಯಯಾ॑ ನರೋ॒ ಜಿವ್ರೀ॒ ಯುವಾ॑ನಾ ಪಿ॒ತರಾ॑ಕೃಣೋತನ ॥
निश्चर्म॑ण ऋभवो॒ गाम॑पिंशत॒ सं व॒त्सेना॑सृजता मा॒तरं॒ पुनः॑ । सौध॑न्वनासः स्वप॒स्यया॑ नरो॒ जिव्री॒ युवा॑ना पि॒तरा॑कृणोतन ॥
ವಾಜೇ॑ಭಿರ್ನೋ॒ ವಾಜ॑ಸಾತಾವವಿಡ್ಢ್ಯೃಭು॒ಮಾಁ ಇಂ॑ದ್ರ ಚಿ॒ತ್ರಮಾ ದ॑ರ್ಷಿ॒ ರಾಧಃ॑ । ತನ್ನೋ॑ ಮಿ॒ತ್ರೋ ವರು॑ಣೋ ಮಾಮಹಂತಾ॒ಮದಿ॑ತಿಃ॒ ಸಿಂಧುಃ॑ ಪೃಥಿ॒ವೀ ಉ॒ತ ದ್ಯೌಃ ॥
वाजे॑भिर्नो॒ वाज॑सातावविड्ढ्यृभु॒माँ इं॑द्र चि॒त्रमा द॑र्षि॒ राधः॑ । तन्नो॑ मि॒त्रो वरु॑णो मामहंता॒मदि॑तिः॒ सिंधुः॑ पृथि॒वी उ॒त द्यौः ॥