ಇಂದ್ರನಿಗೆ ಸ್ತೋತ್ರ ಮತ್ತು ಪ್ರಾರ್ಥನೆ: ಅಜೇಯ ವೀರೋಚಿತ ಶಕ್ತಿ

ಇ॒ಮಾಂ ತೇ॒ ಧಿಯಂ॒ ಪ್ರ ಭ॑ರೇ ಮ॒ಹೋ ಮ॒ಹೀಮ॒ಸ್ಯ ಸ್ತೋ॒ತ್ರೇ ಧಿ॒ಷಣಾ॒ ಯತ್ತ॑ ಆನ॒ಜೇ । ತಮು॑ತ್ಸ॒ವೇ ಚ॑ ಪ್ರಸ॒ವೇ ಚ॑ ಸಾಸ॒ಹಿಮಿಂದ್ರಂ॑ ದೇ॒ವಾಸಃ॒ ಶವ॑ಸಾಮದ॒ನ್ನನು॑ ॥

इ॒मां ते॒ धियं॒ प्र भ॑रे म॒हो म॒हीम॒स्य स्तो॒त्रे धि॒षणा॒ यत्त॑ आन॒जे । तमु॑त्स॒वे च॑ प्रस॒वे च॑ सास॒हिमिंद्रं॑ दे॒वासः॒ शव॑सामद॒न्ननु॑ ॥

ಅ॒ಸ್ಯ ಶ್ರವೋ॑ ನ॒ದ್ಯಃ॑ ಸ॒ಪ್ತ ಬಿ॑ಭ್ರತಿ॒ ದ್ಯಾವಾ॒ಕ್ಷಾಮಾ॑ ಪೃಥಿ॒ವೀ ದ॑ರ್ಶ॒ತಂ ವಪುಃ॑ । ಅ॒ಸ್ಮೇ ಸೂ॑ರ್ಯಾಚಂದ್ರ॒ಮಸಾ॑ಭಿ॒ಚಕ್ಷೇ॑ ಶ್ರ॒ದ್ಧೇ ಕಮಿಂ॑ದ್ರ ಚರತೋ ವಿತರ್ತು॒ರಂ ॥

अ॒स्य श्रवो॑ न॒द्यः॑ स॒प्त बि॑भ्रति॒ द्यावा॒क्षामा॑ पृथि॒वी द॑र्श॒तं वपुः॑ । अ॒स्मे सू॑र्याचंद्र॒मसा॑भि॒चक्षे॑ श्र॒द्धे कमिं॑द्र चरतो वितर्तु॒रं ॥

ತಂ ಸ್ಮಾ॒ ರಥಂ॑ ಮಘವ॒ನ್ಪ್ರಾವ॑ ಸಾ॒ತಯೇ॒ ಜೈತ್ರಂ॒ ಯಂ ತೇ॑ ಅನು॒ಮದಾ॑ಮ ಸಂಗ॒ಮೇ । ಆ॒ಜಾ ನ॑ ಇಂದ್ರ॒ ಮನ॑ಸಾ ಪುರುಷ್ಟುತ ತ್ವಾ॒ಯದ್ಭ್ಯೋ॑ ಮಘವಂ॒ಛರ್ಮ॑ ಯಚ್ಛ ನಃ ॥

तं स्मा॒ रथं॑ मघव॒न्प्राव॑ सा॒तये॒ जैत्रं॒ यं ते॑ अनु॒मदा॑म संग॒मे । आ॒जा न॑ इंद्र॒ मन॑सा पुरुष्टुत त्वा॒यद्भ्यो॑ मघवं॒छर्म॑ यच्छ नः ॥

ವ॒ಯಂ ಜ॑ಯೇಮ॒ ತ್ವಯಾ॑ ಯು॒ಜಾ ವೃತ॑ಮ॒ಸ್ಮಾಕ॒ಮಂಶ॒ಮುದ॑ವಾ॒ ಭರೇ॑ಭರೇ । ಅ॒ಸ್ಮಭ್ಯ॑ಮಿಂದ್ರ॒ ವರಿ॑ವಃ ಸು॒ಗಂ ಕೃ॑ಧಿ॒ ಪ್ರ ಶತ್ರೂ॑ಣಾಂ ಮಘವ॒ನ್ವೃಷ್ಣ್ಯಾ॑ ರುಜ ॥

व॒यं ज॑येम॒ त्वया॑ यु॒जा वृत॑म॒स्माक॒मंश॒मुद॑वा॒ भरे॑भरे । अ॒स्मभ्य॑मिंद्र॒ वरि॑वः सु॒गं कृ॑धि॒ प्र शत्रू॑णां मघव॒न्वृष्ण्या॑ रुज ॥

ನಾನಾ॒ ಹಿ ತ್ವಾ॒ ಹವ॑ಮಾನಾ॒ ಜನಾ॑ ಇ॒ಮೇ ಧನಾ॑ನಾಂ ಧರ್ತ॒ರವ॑ಸಾ ವಿಪ॒ನ್ಯವಃ॑ । ಅ॒ಸ್ಮಾಕಂ॑ ಸ್ಮಾ॒ ರಥ॒ಮಾ ತಿ॑ಷ್ಠ ಸಾ॒ತಯೇ॒ ಜೈತ್ರಂ॒ ಹೀಂ॑ದ್ರ॒ ನಿಭೃ॑ತಂ॒ ಮನ॒ಸ್ತವ॑ ॥

नाना॒ हि त्वा॒ हव॑माना॒ जना॑ इ॒मे धना॑नां धर्त॒रव॑सा विप॒न्यवः॑ । अ॒स्माकं॑ स्मा॒ रथ॒मा ति॑ष्ठ सा॒तये॒ जैत्रं॒ हीं॑द्र॒ निभृ॑तं॒ मन॒स्तव॑ ॥

ಗೋ॒ಜಿತಾ॑ ಬಾ॒ಹೂ ಅಮಿ॑ತಕ್ರತುಃ ಸಿ॒ಮಃ ಕರ್ಮ॑ನ್ಕರ್ಮಂಛ॒ತಮೂ॑ತಿಃ ಖಜಂಕ॒ರಃ । ಅ॒ಕ॒ಲ್ಪ ಇಂದ್ರಃ॑ ಪ್ರತಿ॒ಮಾನ॒ಮೋಜ॒ಸಾಥಾ॒ ಜನಾ॒ ವಿ ಹ್ವ॑ಯಂತೇ ಸಿಷಾ॒ಸವಃ॑ ॥

गो॒जिता॑ बा॒हू अमि॑तक्रतुः सि॒मः कर्म॑न्कर्मंछ॒तमू॑तिः खजंक॒रः । अ॒क॒ल्प इंद्रः॑ प्रति॒मान॒मोज॒साथा॒ जना॒ वि ह्व॑यंते सिषा॒सवः॑ ॥

ಉತ್ತೇ॑ ಶ॒ತಾನ್ಮ॑ಘವ॒ನ್ನುಚ್ಚ॒ ಭೂಯ॑ಸ॒ ಉತ್ಸ॒ಹಸ್ರಾ॑ದ್ರಿರಿಚೇ ಕೃ॒ಷ್ಟಿಷು॒ ಶ್ರವಃ॑ । ಅ॒ಮಾ॒ತ್ರಂ ತ್ವಾ॑ ಧಿ॒ಷಣಾ॑ ತಿತ್ವಿಷೇ ಮ॒ಹ್ಯಧಾ॑ ವೃ॒ತ್ರಾಣಿ॑ ಜಿಘ್ನಸೇ ಪುರಂದರ ॥

उत्ते॑ श॒तान्म॑घव॒न्नुच्च॒ भूय॑स॒ उत्स॒हस्रा॑द्रिरिचे कृ॒ष्टिषु॒ श्रवः॑ । अ॒मा॒त्रं त्वा॑ धि॒षणा॑ तित्विषे म॒ह्यधा॑ वृ॒त्राणि॑ जिघ्नसे पुरंदर ॥

ತ್ರಿ॒ವಿ॒ಷ್ಟಿ॒ಧಾತು॑ ಪ್ರತಿ॒ಮಾನ॒ಮೋಜ॑ಸಸ್ತಿ॒ಸ್ರೋ ಭೂಮೀ॑ರ್ನೃಪತೇ॒ ತ್ರೀಣಿ॑ ರೋಚ॒ನಾ । ಅತೀ॒ದಂ ವಿಶ್ವಂ॒ ಭುವ॑ನಂ ವವಕ್ಷಿಥಾಶ॒ತ್ರುರಿಂ॑ದ್ರ ಜ॒ನುಷಾ॑ ಸ॒ನಾದ॑ಸಿ ॥

त्रि॒वि॒ष्टि॒धातु॑ प्रति॒मान॒मोज॑सस्ति॒स्रो भूमी॑र्नृपते॒ त्रीणि॑ रोच॒ना । अती॒दं विश्वं॒ भुव॑नं ववक्षिथाश॒त्रुरिं॑द्र ज॒नुषा॑ स॒नाद॑सि ॥

ತ್ವಾಂ ದೇ॒ವೇಷು॑ ಪ್ರಥ॒ಮಂ ಹ॑ವಾಮಹೇ॒ ತ್ವಂ ಬ॑ಭೂಥ॒ ಪೃತ॑ನಾಸು ಸಾಸ॒ಹಿಃ । ಸೇಮಂ ನಃ॑ ಕಾ॒ರುಮು॑ಪಮ॒ನ್ಯುಮು॒ದ್ಭಿದ॒ಮಿಂದ್ರಃ॑ ಕೃಣೋತು ಪ್ರಸ॒ವೇ ರಥಂ॑ ಪು॒ರಃ ॥

त्वां दे॒वेषु॑ प्रथ॒मं ह॑वामहे॒ त्वं ब॑भूथ॒ पृत॑नासु सास॒हिः । सेमं नः॑ का॒रुमु॑पम॒न्युमु॒द्भिद॒मिंद्रः॑ कृणोतु प्रस॒वे रथं॑ पु॒रः ॥

ತ್ವಂ ಜಿ॑ಗೇಥ॒ ನ ಧನಾ॑ ರುರೋಧಿ॒ಥಾರ್ಭೇ॑ಷ್ವಾ॒ಜಾ ಮ॑ಘವನ್ಮ॒ಹತ್ಸು॑ ಚ । ತ್ವಾಮು॒ಗ್ರಮವ॑ಸೇ॒ ಸಂ ಶಿ॑ಶೀಮ॒ಸ್ಯಥಾ॑ ನ ಇಂದ್ರ॒ ಹವ॑ನೇಷು ಚೋದಯ ॥

त्वं जि॑गेथ॒ न धना॑ रुरोधि॒थार्भे॑ष्वा॒जा म॑घवन्म॒हत्सु॑ च । त्वामु॒ग्रमव॑से॒ सं शि॑शीम॒स्यथा॑ न इंद्र॒ हव॑नेषु चोदय ॥

ವಿ॒ಶ್ವಾಹೇಂದ್ರೋ॑ ಅಧಿವ॒ಕ್ತಾ ನೋ॑ ಅ॒ಸ್ತ್ವಪ॑ರಿಹ್ವೃತಾಃ ಸನುಯಾಮ॒ ವಾಜಂ॑ । ತನ್ನೋ॑ ಮಿ॒ತ್ರೋ ವರು॑ಣೋ ಮಾಮಹಂತಾ॒ಮದಿ॑ತಿಃ॒ ಸಿಂಧುಃ॑ ಪೃಥಿ॒ವೀ ಉ॒ತ ದ್ಯೌಃ ॥

वि॒श्वाहेंद्रो॑ अधिव॒क्ता नो॑ अ॒स्त्वप॑रिह्वृताः सनुयाम॒ वाजं॑ । तन्नो॑ मि॒त्रो वरु॑णो मामहंता॒मदि॑तिः॒ सिंधुः॑ पृथि॒वी उ॒त द्यौः ॥