ಇಂದ್ರನ ವೀರಗಾಥೆ ಮತ್ತು ಬ್ರಹ್ಮಾಂಡದ ಸೃಷ್ಟಿ - ಋಗ್ವೇದ ಮಂಡಲ ೧, ಸೂಕ್ತ ೧೦೩

ತತ್ತ॑ ಇಂದ್ರಿ॒ಯಂ ಪ॑ರ॒ಮಂ ಪ॑ರಾ॒ಚೈರಧಾ॑ರಯಂತ ಕ॒ವಯಃ॑ ಪು॒ರೇದಂ । ಕ್ಷ॒ಮೇದಮ॒ನ್ಯದ್ದಿ॒ವ್ಯ೧॒॑ನ್ಯದ॑ಸ್ಯ॒ ಸಮೀ॑ ಪೃಚ್ಯತೇ ಸಮ॒ನೇವ॑ ಕೇ॒ತುಃ ॥

तत्त॑ इंद्रि॒यं प॑र॒मं प॑रा॒चैरधा॑रयंत क॒वयः॑ पु॒रेदं । क्ष॒मेदम॒न्यद्दि॒व्य१॒॑न्यद॑स्य॒ समी॑ पृच्यते सम॒नेव॑ के॒तुः ॥

ಸ ಧಾ॑ರಯತ್ಪೃಥಿ॒ವೀಂ ಪ॒ಪ್ರಥ॑ಚ್ಚ॒ ವಜ್ರೇ॑ಣ ಹ॒ತ್ವಾ ನಿರ॒ಪಃ ಸ॑ಸರ್ಜ । ಅಹ॒ನ್ನಹಿ॒ಮಭಿ॑ನದ್ರೌಹಿ॒ಣಂ ವ್ಯಹ॒ನ್ವ್ಯಂ॑ಸಂ ಮ॒ಘವಾ॒ ಶಚೀ॑ಭಿಃ ॥

स धा॑रयत्पृथि॒वीं प॒प्रथ॑च्च॒ वज्रे॑ण ह॒त्वा निर॒पः स॑सर्ज । अह॒न्नहि॒मभि॑नद्रौहि॒णं व्यह॒न्व्यं॑सं म॒घवा॒ शची॑भिः ॥

ಸ ಜಾ॒ತೂಭ॑ರ್ಮಾ ಶ್ರ॒ದ್ದಧಾ॑ನ॒ ಓಜಃ॒ ಪುರೋ॑ ವಿಭಿಂ॒ದನ್ನ॑ಚರ॒ದ್ವಿ ದಾಸೀಃ॑ । ವಿ॒ದ್ವಾನ್ವ॑ಜ್ರಿಂ॒ದಸ್ಯ॑ವೇ ಹೇ॒ತಿಮ॒ಸ್ಯಾರ್ಯಂ॒ ಸಹೋ॑ ವರ್ಧಯಾ ದ್ಯು॒ಮ್ನಮಿಂ॑ದ್ರ ॥

स जा॒तूभ॑र्मा श्र॒द्दधा॑न॒ ओजः॒ पुरो॑ विभिं॒दन्न॑चर॒द्वि दासीः॑ । वि॒द्वान्व॑ज्रिं॒दस्य॑वे हे॒तिम॒स्यार्यं॒ सहो॑ वर्धया द्यु॒म्नमिं॑द्र ॥

ತದೂ॒ಚುಷೇ॒ ಮಾನು॑ಷೇ॒ಮಾ ಯು॒ಗಾನಿ॑ ಕೀ॒ರ್ತೇನ್ಯಂ॑ ಮ॒ಘವಾ॒ ನಾಮ॒ ಬಿಭ್ರ॑ತ್ । ಉ॒ಪ॒ಪ್ರ॒ಯಂದ॑ಸ್ಯು॒ಹತ್ಯಾ॑ಯ ವ॒ಜ್ರೀ ಯದ್ಧ॑ ಸೂ॒ನುಃ ಶ್ರವ॑ಸೇ॒ ನಾಮ॑ ದ॒ಧೇ ॥

तदू॒चुषे॒ मानु॑षे॒मा यु॒गानि॑ की॒र्तेन्यं॑ म॒घवा॒ नाम॒ बिभ्र॑त् । उ॒प॒प्र॒यंद॑स्यु॒हत्या॑य व॒ज्री यद्ध॑ सू॒नुः श्रव॑से॒ नाम॑ द॒धे ॥

ತದ॑ಸ್ಯೇ॒ದಂ ಪ॑ಶ್ಯತಾ॒ ಭೂರಿ॑ ಪು॒ಷ್ಟಂ ಶ್ರದಿಂದ್ರ॑ಸ್ಯ ಧತ್ತನ ವೀ॒ರ್ಯಾ॑ಯ । ಸ ಗಾ ಅ॑ವಿಂದ॒ತ್ಸೋ ಅ॑ವಿಂದ॒ದಶ್ವಾ॒ನ್ತ್ಸ ಓಷ॑ಧೀಃ॒ ಸೋ ಅ॒ಪಃ ಸ ವನಾ॑ನಿ ॥

तद॑स्ये॒दं प॑श्यता॒ भूरि॑ पु॒ष्टं श्रदिंद्र॑स्य धत्तन वी॒र्या॑य । स गा अ॑विंद॒त्सो अ॑विंद॒दश्वा॒न्त्स ओष॑धीः॒ सो अ॒पः स वना॑नि ॥

ಭೂರಿ॑ಕರ್ಮಣೇ ವೃಷ॒ಭಾಯ॒ ವೃಷ್ಣೇ॑ ಸ॒ತ್ಯಶು॑ಷ್ಮಾಯ ಸುನವಾಮ॒ ಸೋಮಂ॑ । ಯ ಆ॒ದೃತ್ಯಾ॑ ಪರಿಪಂ॒ಥೀವ॒ ಶೂರೋಽಯ॑ಜ್ವನೋ ವಿ॒ಭಜ॒ನ್ನೇತಿ॒ ವೇದಃ॑ ॥

भूरि॑कर्मणे वृष॒भाय॒ वृष्णे॑ स॒त्यशु॑ष्माय सुनवाम॒ सोमं॑ । य आ॒दृत्या॑ परिपं॒थीव॒ शूरोऽय॑ज्वनो वि॒भज॒न्नेति॒ वेदः॑ ॥

ತದಿಂ॑ದ್ರ॒ ಪ್ರೇವ॑ ವೀ॒ರ್ಯಂ॑ ಚಕರ್ಥ॒ ಯತ್ಸ॒ಸಂತಂ॒ ವಜ್ರೇ॒ಣಾಬೋ॑ಧ॒ಯೋಽಹಿಂ॑ । ಅನು॑ ತ್ವಾ॒ ಪತ್ನೀ॑ರ್ಹೃಷಿ॒ತಂ ವಯ॑ಶ್ಚ॒ ವಿಶ್ವೇ॑ ದೇ॒ವಾಸೋ॑ ಅಮದ॒ನ್ನನು॑ ತ್ವಾ ॥

तदिं॑द्र॒ प्रेव॑ वी॒र्यं॑ चकर्थ॒ यत्स॒संतं॒ वज्रे॒णाबो॑ध॒योऽहिं॑ । अनु॑ त्वा॒ पत्नी॑र्हृषि॒तं वय॑श्च॒ विश्वे॑ दे॒वासो॑ अमद॒न्ननु॑ त्वा ॥

ಶುಷ್ಣಂ॒ ಪಿಪ್ರುಂ॒ ಕುಯ॑ವಂ ವೃ॒ತ್ರಮಿಂ॑ದ್ರ ಯ॒ದಾವ॑ಧೀ॒ರ್ವಿ ಪುರಃ॒ ಶಂಬ॑ರಸ್ಯ । ತನ್ನೋ॑ ಮಿ॒ತ್ರೋ ವರು॑ಣೋ ಮಾಮಹಂತಾ॒ಮದಿ॑ತಿಃ॒ ಸಿಂಧುಃ॑ ಪೃಥಿ॒ವೀ ಉ॒ತ ದ್ಯೌಃ ॥

शुष्णं॒ पिप्रुं॒ कुय॑वं वृ॒त्रमिं॑द्र य॒दाव॑धी॒र्वि पुरः॒ शंब॑रस्य । तन्नो॑ मि॒त्रो वरु॑णो मामहंता॒मदि॑तिः॒ सिंधुः॑ पृथि॒वी उ॒त द्यौः ॥