Sūkta 97

अप॑ नः॒ शोशु॑चद॒घमग्ने॑ शुशु॒ग्ध्या र॒यिं । अप॑ नः॒ शोशु॑चद॒घं ॥

ápa naḥ śóśucadaghámágne śuśugdhyā́ rayím ǀ ápa naḥ śóśucadaghám ǁ

सु॒क्षे॒त्रि॒या सु॑गातु॒या व॑सू॒या च॑ यजामहे । अप॑ नः॒ शोशु॑चद॒घं ॥

sukṣetriyā́ sugātuyā́ vasūyā́ ca yajāmahe ǀ ápa naḥ śóśucadaghám ǁ

प्र यद्भंदि॑ष्ठ एषां॒ प्रास्माका॑सश्च सू॒रयः॑ । अप॑ नः॒ शोशु॑चद॒घं ॥

prá yádbhándiṣṭha eṣām prā́smā́kāsaśca sūráyaḥ ǀ ápa naḥ śóśucadaghám ǁ

प्र यत्ते॑ अग्ने सू॒रयो॒ जाये॑महि॒ प्र ते॑ व॒यं । अप॑ नः॒ शोशु॑चद॒घं ॥

prá yátte agne sūráyo jā́yemahi prá te vayám ǀ ápa naḥ śóśucadaghám ǁ

प्र यद॒ग्नेः सह॑स्वतो वि॒श्वतो॒ यंति॑ भा॒नवः॑ । अप॑ नः॒ शोशु॑चद॒घं ॥

prá yádagnéḥ sáhasvato viśváto yánti bhānávaḥ ǀ ápa naḥ śóśucadaghám ǁ

त्वं हि वि॑श्वतोमुख वि॒श्वतः॑ परि॒भूरसि॑ । अप॑ नः॒ शोशु॑चद॒घं ॥

tvám hí viśvatomukha viśvátaḥ paribhū́rási ǀ ápa naḥ śóśucadaghám ǁ

द्विषो॑ नो विश्वतोमु॒खाति॑ ना॒वेव॑ पारय । अप॑ नः॒ शोशु॑चद॒घं ॥

dvíṣo no viśvatomukhā́ti nāvéva pāraya ǀ ápa naḥ śóśucadaghám ǁ

स नः॒ सिंधु॑मिव ना॒वयाति॑ पर्षा स्व॒स्तये॑ । अप॑ नः॒ शोशु॑चद॒घं ॥

sá naḥ síndhumiva nāváyā́ti parṣā svastáye ǀ ápa naḥ śóśucadaghám ǁ