ಅಗ್ನೀಷೋಮರ ಸ್ತುತಿ: ದೈವೀ ಶಕ್ತಿ ಹಾಗೂ ಪ್ರಕಾಶದ ಸಂಗಮ

ಅಗ್ನೀ॑ಷೋಮಾವಿ॒ಮಂ ಸು ಮೇ॑ ಶೃಣು॒ತಂ ವೃ॑ಷಣಾ॒ ಹವಂ॑ । ಪ್ರತಿ॑ ಸೂ॒ಕ್ತಾನಿ॑ ಹರ್ಯತಂ॒ ಭವ॑ತಂ ದಾ॒ಶುಷೇ॒ ಮಯಃ॑ ॥

अग्नी॑षोमावि॒मं सु मे॑ शृणु॒तं वृ॑षणा॒ हवं॑ । प्रति॑ सू॒क्तानि॑ हर्यतं॒ भव॑तं दा॒शुषे॒ मयः॑ ॥

ಅಗ್ನೀ॑ಷೋಮಾ॒ ಯೋ ಅ॒ದ್ಯ ವಾ॑ಮಿ॒ದಂ ವಚಃ॑ ಸಪ॒ರ್ಯತಿ॑ । ತಸ್ಮೈ॑ ಧತ್ತಂ ಸು॒ವೀರ್ಯಂ॒ ಗವಾಂ॒ ಪೋಷಂ॒ ಸ್ವಶ್ವ್ಯಂ॑ ॥

अग्नी॑षोमा॒ यो अ॒द्य वा॑मि॒दं वचः॑ सप॒र्यति॑ । तस्मै॑ धत्तं सु॒वीर्यं॒ गवां॒ पोषं॒ स्वश्व्यं॑ ॥

ಅಗ್ನೀ॑ಷೋಮಾ॒ ಯ ಆಹು॑ತಿಂ॒ ಯೋ ವಾಂ॒ ದಾಶಾ॑ದ್ಧ॒ವಿಷ್ಕೃ॑ತಿಂ । ಸ ಪ್ರ॒ಜಯಾ॑ ಸು॒ವೀರ್ಯಂ॒ ವಿಶ್ವ॒ಮಾಯು॒ರ್ವ್ಯ॑ಶ್ನವತ್ ॥

अग्नी॑षोमा॒ य आहु॑तिं॒ यो वां॒ दाशा॑द्ध॒विष्कृ॑तिं । स प्र॒जया॑ सु॒वीर्यं॒ विश्व॒मायु॒र्व्य॑श्नवत् ॥

ಅಗ್ನೀ॑ಷೋಮಾ॒ ಚೇತಿ॒ ತದ್ವೀ॒ರ್ಯಂ॑ ವಾಂ॒ ಯದಮು॑ಷ್ಣೀತಮವ॒ಸಂ ಪ॒ಣಿಂ ಗಾಃ । ಅವಾ॑ತಿರತಂ॒ ಬೃಸ॑ಯಸ್ಯ॒ ಶೇಷೋಽವಿಂ॑ದತಂ॒ ಜ್ಯೋತಿ॒ರೇಕಂ॑ ಬ॒ಹುಭ್ಯಃ॑ ॥

अग्नी॑षोमा॒ चेति॒ तद्वी॒र्यं॑ वां॒ यदमु॑ष्णीतमव॒सं प॒णिं गाः । अवा॑तिरतं॒ बृस॑यस्य॒ शेषोऽविं॑दतं॒ ज्योति॒रेकं॑ ब॒हुभ्यः॑ ॥

ಯು॒ವಮೇ॒ತಾನಿ॑ ದಿ॒ವಿ ರೋ॑ಚ॒ನಾನ್ಯ॒ಗ್ನಿಶ್ಚ॑ ಸೋಮ॒ ಸಕ್ರ॑ತೂ ಅಧತ್ತಂ । ಯು॒ವಂ ಸಿಂಧೂಁ॑ರ॒ಭಿಶ॑ಸ್ತೇರವ॒ದ್ಯಾದಗ್ನೀ॑ಷೋಮಾ॒ವಮುಂ॑ಚತಂ ಗೃಭೀ॒ತಾನ್ ॥

यु॒वमे॒तानि॑ दि॒वि रो॑च॒नान्य॒ग्निश्च॑ सोम॒ सक्र॑तू अधत्तं । यु॒वं सिंधूँ॑र॒भिश॑स्तेरव॒द्यादग्नी॑षोमा॒वमुं॑चतं गृभी॒तान् ॥

ಆನ್ಯಂ ದಿ॒ವೋ ಮಾ॑ತ॒ರಿಶ್ವಾ॑ ಜಭಾ॒ರಾಮ॑ಥ್ನಾದ॒ನ್ಯಂ ಪರಿ॑ ಶ್ಯೇ॒ನೋ ಅದ್ರೇಃ॑ । ಅಗ್ನೀ॑ಷೋಮಾ॒ ಬ್ರಹ್ಮ॑ಣಾ ವಾವೃಧಾ॒ನೋರುಂ ಯ॒ಜ್ಞಾಯ॑ ಚಕ್ರಥುರು ಲೋ॒ಕಂ ॥

आन्यं दि॒वो मा॑त॒रिश्वा॑ जभा॒राम॑थ्नाद॒न्यं परि॑ श्ये॒नो अद्रेः॑ । अग्नी॑षोमा॒ ब्रह्म॑णा वावृधा॒नोरुं य॒ज्ञाय॑ चक्रथुरु लो॒कं ॥

ಅಗ್ನೀ॑ಷೋಮಾ ಹ॒ವಿಷಃ॒ ಪ್ರಸ್ಥಿ॑ತಸ್ಯ ವೀ॒ತಂ ಹರ್ಯ॑ತಂ ವೃಷಣಾ ಜು॒ಷೇಥಾಂ॑ । ಸು॒ಶರ್ಮಾ॑ಣಾ॒ ಸ್ವವ॑ಸಾ॒ ಹಿ ಭೂ॒ತಮಥಾ॑ ಧತ್ತಂ॒ ಯಜ॑ಮಾನಾಯ॒ ಶಂ ಯೋಃ ॥

अग्नी॑षोमा ह॒विषः॒ प्रस्थि॑तस्य वी॒तं हर्य॑तं वृषणा जु॒षेथां॑ । सु॒शर्मा॑णा॒ स्वव॑सा॒ हि भू॒तमथा॑ धत्तं॒ यज॑मानाय॒ शं योः ॥

ಯೋ ಅ॒ಗ್ನೀಷೋಮಾ॑ ಹ॒ವಿಷಾ॑ ಸಪ॒ರ್ಯಾದ್ದೇ॑ವ॒ದ್ರೀಚಾ॒ ಮನ॑ಸಾ॒ ಯೋ ಘೃ॒ತೇನ॑ । ತಸ್ಯ॑ ವ್ರ॒ತಂ ರ॑ಕ್ಷತಂ ಪಾ॒ತಮಂಹ॑ಸೋ ವಿ॒ಶೇ ಜನಾ॑ಯ॒ ಮಹಿ॒ ಶರ್ಮ॑ ಯಚ್ಛತಂ ॥

यो अ॒ग्नीषोमा॑ ह॒विषा॑ सप॒र्याद्दे॑व॒द्रीचा॒ मन॑सा॒ यो घृ॒तेन॑ । तस्य॑ व्र॒तं र॑क्षतं पा॒तमंह॑सो वि॒शे जना॑य॒ महि॒ शर्म॑ यच्छतं ॥

ಅಗ್ನೀ॑ಷೋಮಾ॒ ಸವೇ॑ದಸಾ॒ ಸಹೂ॑ತೀ ವನತಂ॒ ಗಿರಃ॑ । ಸಂ ದೇ॑ವ॒ತ್ರಾ ಬ॑ಭೂವಥುಃ ॥

अग्नी॑षोमा॒ सवे॑दसा॒ सहू॑ती वनतं॒ गिरः॑ । सं दे॑व॒त्रा ब॑भूवथुः ॥

ಅಗ್ನೀ॑ಷೋಮಾವ॒ನೇನ॑ ವಾಂ॒ ಯೋ ವಾಂ॑ ಘೃ॒ತೇನ॒ ದಾಶ॑ತಿ । ತಸ್ಮೈ॑ ದೀದಯತಂ ಬೃ॒ಹತ್ ॥

अग्नी॑षोमाव॒नेन॑ वां॒ यो वां॑ घृ॒तेन॒ दाश॑ति । तस्मै॑ दीदयतं बृ॒हत् ॥

ಅಗ್ನೀ॑ಷೋಮಾವಿ॒ಮಾನಿ॑ ನೋ ಯು॒ವಂ ಹ॒ವ್ಯಾ ಜು॑ಜೋಷತಂ । ಆ ಯಾ॑ತ॒ಮುಪ॑ ನಃ॒ ಸಚಾ॑ ॥

अग्नी॑षोमावि॒मानि॑ नो यु॒वं ह॒व्या जु॑जोषतं । आ या॑त॒मुप॑ नः॒ सचा॑ ॥

ಅಗ್ನೀ॑ಷೋಮಾ ಪಿಪೃ॒ತಮರ್ವ॑ತೋ ನ॒ ಆ ಪ್ಯಾ॑ಯಂತಾಮು॒ಸ್ರಿಯಾ॑ ಹವ್ಯ॒ಸೂದಃ॑ । ಅ॒ಸ್ಮೇ ಬಲಾ॑ನಿ ಮ॒ಘವ॑ತ್ಸು ಧತ್ತಂ ಕೃಣು॒ತಂ ನೋ॑ ಅಧ್ವ॒ರಂ ಶ್ರು॑ಷ್ಟಿ॒ಮಂತಂ॑ ॥

अग्नी॑षोमा पिपृ॒तमर्व॑तो न॒ आ प्या॑यंतामु॒स्रिया॑ हव्य॒सूदः॑ । अ॒स्मे बला॑नि म॒घव॑त्सु धत्तं कृणु॒तं नो॑ अध्व॒रं श्रु॑ष्टि॒मंतं॑ ॥