ವೈಶ್ವಾನರ ಅಗ್ನಿಯ ಮಹತ್ವ ಮತ್ತು ವಿಶ್ವವ್ಯಾಪಕತೆ

ವ॒ಯಾ ಇದ॑ಗ್ನೇ ಅ॒ಗ್ನಯ॑ಸ್ತೇ ಅ॒ನ್ಯೇ ತ್ವೇ ವಿಶ್ವೇ॑ ಅ॒ಮೃತಾ॑ ಮಾದಯಂತೇ । ವೈಶ್ವಾ॑ನರ॒ ನಾಭಿ॑ರಸಿ ಕ್ಷಿತೀ॒ನಾಂ ಸ್ಥೂಣೇ॑ವ॒ ಜನಾಁ॑ ಉಪ॒ಮಿದ್ಯ॑ಯಂಥ ॥

व॒या इद॑ग्ने अ॒ग्नय॑स्ते अ॒न्ये त्वे विश्वे॑ अ॒मृता॑ मादयंते । वैश्वा॑नर॒ नाभि॑रसि क्षिती॒नां स्थूणे॑व॒ जनाँ॑ उप॒मिद्य॑यंथ ॥

ಮೂ॒ರ್ಧಾ ದಿ॒ವೋ ನಾಭಿ॑ರ॒ಗ್ನಿಃ ಪೃ॑ಥಿ॒ವ್ಯಾ ಅಥಾ॑ಭವದರ॒ತೀ ರೋದ॑ಸ್ಯೋಃ । ತಂ ತ್ವಾ॑ ದೇ॒ವಾಸೋ॑ಽಜನಯಂತ ದೇ॒ವಂ ವೈಶ್ವಾ॑ನರ॒ ಜ್ಯೋತಿ॒ರಿದಾರ್ಯಾ॑ಯ ॥

मू॒र्धा दि॒वो नाभि॑र॒ग्निः पृ॑थि॒व्या अथा॑भवदर॒ती रोद॑स्योः । तं त्वा॑ दे॒वासो॑ऽजनयंत दे॒वं वैश्वा॑नर॒ ज्योति॒रिदार्या॑य ॥

ಆ ಸೂರ್ಯೇ॒ ನ ರ॒ಶ್ಮಯೋ॑ ಧ್ರು॒ವಾಸೋ॑ ವೈಶ್ವಾನ॒ರೇ ದ॑ಧಿರೇ॒ಽಗ್ನಾ ವಸೂ॑ನಿ । ಯಾ ಪರ್ವ॑ತೇ॒ಷ್ವೋಷ॑ಧೀಷ್ವ॒ಪ್ಸು ಯಾ ಮಾನು॑ಷೇ॒ಷ್ವಸಿ॒ ತಸ್ಯ॒ ರಾಜಾ॑ ॥

आ सूर्ये॒ न र॒श्मयो॑ ध्रु॒वासो॑ वैश्वान॒रे द॑धिरे॒ऽग्ना वसू॑नि । या पर्व॑ते॒ष्वोष॑धीष्व॒प्सु या मानु॑षे॒ष्वसि॒ तस्य॒ राजा॑ ॥

ಬೃ॒ಹ॒ತೀ ಇ॑ವ ಸೂ॒ನವೇ॒ ರೋದ॑ಸೀ॒ ಗಿರೋ॒ ಹೋತಾ॑ ಮನು॒ಷ್ಯೋ॒೩॒॑ ನ ದಕ್ಷಃ॑ । ಸ್ವ॑ರ್ವತೇ ಸ॒ತ್ಯಶು॑ಷ್ಮಾಯ ಪೂ॒ರ್ವೀರ್ವೈ॑ಶ್ವಾನ॒ರಾಯ॒ ನೃತ॑ಮಾಯ ಯ॒ಹ್ವೀಃ ॥

बृ॒ह॒ती इ॑व सू॒नवे॒ रोद॑सी॒ गिरो॒ होता॑ मनु॒ष्यो॒३॒॑ न दक्षः॑ । स्व॑र्वते स॒त्यशु॑ष्माय पू॒र्वीर्वै॑श्वान॒राय॒ नृत॑माय य॒ह्वीः ॥

ದಿ॒ವಶ್ಚಿ॑ತ್ತೇ ಬೃಹ॒ತೋ ಜಾ॑ತವೇದೋ॒ ವೈಶ್ವಾ॑ನರ॒ ಪ್ರ ರಿ॑ರಿಚೇ ಮಹಿ॒ತ್ವಂ । ರಾಜಾ॑ ಕೃಷ್ಟೀ॒ನಾಮ॑ಸಿ॒ ಮಾನು॑ಷೀಣಾಂ ಯು॒ಧಾ ದೇ॒ವೇಭ್ಯೋ॒ ವರಿ॑ವಶ್ಚಕರ್ಥ ॥

दि॒वश्चि॑त्ते बृह॒तो जा॑तवेदो॒ वैश्वा॑नर॒ प्र रि॑रिचे महि॒त्वं । राजा॑ कृष्टी॒नाम॑सि॒ मानु॑षीणां यु॒धा दे॒वेभ्यो॒ वरि॑वश्चकर्थ ॥

ಪ್ರ ನೂ ಮ॑ಹಿ॒ತ್ವಂ ವೃ॑ಷ॒ಭಸ್ಯ॑ ವೋಚಂ॒ ಯಂ ಪೂ॒ರವೋ॑ ವೃತ್ರ॒ಹಣಂ॒ ಸಚಂ॑ತೇ । ವೈ॒ಶ್ವಾ॒ನ॒ರೋ ದಸ್ಯು॑ಮ॒ಗ್ನಿರ್ಜ॑ಘ॒ನ್ವಾಁ ಅಧೂ॑ನೋ॒ತ್ಕಾಷ್ಠಾ॒ ಅವ॒ ಶಂಬ॑ರಂ ಭೇತ್ ॥

प्र नू म॑हि॒त्वं वृ॑ष॒भस्य॑ वोचं॒ यं पू॒रवो॑ वृत्र॒हणं॒ सचं॑ते । वै॒श्वा॒न॒रो दस्यु॑म॒ग्निर्ज॑घ॒न्वाँ अधू॑नो॒त्काष्ठा॒ अव॒ शंब॑रं भेत् ॥

ವೈ॒ಶ್ವಾ॒ನ॒ರೋ ಮ॑ಹಿ॒ಮ್ನಾ ವಿ॒ಶ್ವಕೃ॑ಷ್ಟಿರ್ಭ॒ರದ್ವಾ॑ಜೇಷು ಯಜ॒ತೋ ವಿ॒ಭಾವಾ॑ । ಶಾ॒ತ॒ವ॒ನೇ॒ಯೇ ಶ॒ತಿನೀ॑ಭಿರ॒ಗ್ನಿಃ ಪು॑ರುಣೀ॒ಥೇ ಜ॑ರತೇ ಸೂ॒ನೃತಾ॑ವಾನ್ ॥

वै॒श्वा॒न॒रो म॑हि॒म्ना वि॒श्वकृ॑ष्टिर्भ॒रद्वा॑जेषु यज॒तो वि॒भावा॑ । शा॒त॒व॒ने॒ये श॒तिनी॑भिर॒ग्निः पु॑रुणी॒थे ज॑रते सू॒नृता॑वान् ॥