ಸೂಕ್ತ 184

ತಾ ವಾ॑ಮ॒ದ್ಯ ತಾವ॑ಪ॒ರಂ ಹು॑ವೇಮೋ॒ಚ್ಛಂತ್ಯಾ॑ಮು॒ಷಸಿ॒ ವಹ್ನಿ॑ರು॒ಕ್ಥೈಃ । ನಾಸ॑ತ್ಯಾ॒ ಕುಹ॑ ಚಿ॒ತ್ಸಂತಾ॑ವ॒ರ್ಯೋ ದಿ॒ವೋ ನಪಾ॑ತಾ ಸು॒ದಾಸ್ತ॑ರಾಯ ॥

ता वा॑म॒द्य ताव॑प॒रं हु॑वेमो॒च्छंत्या॑मु॒षसि॒ वह्नि॑रु॒क्थैः । नास॑त्या॒ कुह॑ चि॒त्संता॑व॒र्यो दि॒वो नपा॑ता सु॒दास्त॑राय ॥

ಅ॒ಸ್ಮೇ ಊ॒ ಷು ವೃ॑ಷಣಾ ಮಾದಯೇಥಾ॒ಮುತ್ಪ॒ಣೀಁರ್ಹ॑ತಮೂ॒ರ್ಮ್ಯಾ ಮದಂ॑ತಾ । ಶ್ರು॒ತಂ ಮೇ॒ ಅಚ್ಛೋ॑ಕ್ತಿಭಿರ್ಮತೀ॒ನಾಮೇಷ್ಟಾ॑ ನರಾ॒ ನಿಚೇ॑ತಾರಾ ಚ॒ ಕರ್ಣೈಃ॑ ॥

अ॒स्मे ऊ॒ षु वृ॑षणा मादयेथा॒मुत्प॒णीँर्ह॑तमू॒र्म्या मदं॑ता । श्रु॒तं मे॒ अच्छो॑क्तिभिर्मती॒नामेष्टा॑ नरा॒ निचे॑तारा च॒ कर्णैः॑ ॥

ಶ್ರಿ॒ಯೇ ಪೂ॑ಷನ್ನಿಷು॒ಕೃತೇ॑ವ ದೇ॒ವಾ ನಾಸ॑ತ್ಯಾ ವಹ॒ತುಂ ಸೂ॒ರ್ಯಾಯಾಃ॑ । ವ॒ಚ್ಯಂತೇ॑ ವಾಂ ಕಕು॒ಹಾ ಅ॒ಪ್ಸು ಜಾ॒ತಾ ಯು॒ಗಾ ಜೂ॒ರ್ಣೇವ॒ ವರು॑ಣಸ್ಯ॒ ಭೂರೇಃ॑ ॥

श्रि॒ये पू॑षन्निषु॒कृते॑व दे॒वा नास॑त्या वह॒तुं सू॒र्यायाः॑ । व॒च्यंते॑ वां ककु॒हा अ॒प्सु जा॒ता यु॒गा जू॒र्णेव॒ वरु॑णस्य॒ भूरेः॑ ॥

ಅ॒ಸ್ಮೇ ಸಾ ವಾಂ॑ ಮಾಧ್ವೀ ರಾ॒ತಿರ॑ಸ್ತು॒ ಸ್ತೋಮಂ॑ ಹಿನೋತಂ ಮಾ॒ನ್ಯಸ್ಯ॑ ಕಾ॒ರೋಃ । ಅನು॒ ಯದ್ವಾಂ॑ ಶ್ರವ॒ಸ್ಯಾ॑ ಸುದಾನೂ ಸು॒ವೀರ್ಯಾ॑ಯ ಚರ್ಷ॒ಣಯೋ॒ ಮದಂ॑ತಿ ॥

अ॒स्मे सा वां॑ माध्वी रा॒तिर॑स्तु॒ स्तोमं॑ हिनोतं मा॒न्यस्य॑ का॒रोः । अनु॒ यद्वां॑ श्रव॒स्या॑ सुदानू सु॒वीर्या॑य चर्ष॒णयो॒ मदं॑ति ॥

ಏ॒ಷ ವಾಂ॒ ಸ್ತೋಮೋ॑ ಅಶ್ವಿನಾವಕಾರಿ॒ ಮಾನೇ॑ಭಿರ್ಮಘವಾನಾ ಸುವೃ॒ಕ್ತಿ । ಯಾ॒ತಂ ವ॒ರ್ತಿಸ್ತನ॑ಯಾಯ॒ ತ್ಮನೇ॑ ಚಾ॒ಗಸ್ತ್ಯೇ॑ ನಾಸತ್ಯಾ॒ ಮದಂ॑ತಾ ॥

ए॒ष वां॒ स्तोमो॑ अश्विनावकारि॒ माने॑भिर्मघवाना सुवृ॒क्ति । या॒तं व॒र्तिस्तन॑याय॒ त्मने॑ चा॒गस्त्ये॑ नासत्या॒ मदं॑ता ॥

ಅತಾ॑ರಿಷ್ಮ॒ ತಮ॑ಸಸ್ಪಾ॒ರಮ॒ಸ್ಯ ಪ್ರತಿ॑ ವಾಂ॒ ಸ್ತೋಮೋ॑ ಅಶ್ವಿನಾವಧಾಯಿ । ಏಹ ಯಾ॑ತಂ ಪ॒ಥಿಭಿ॑ರ್ದೇವ॒ಯಾನೈ॑ರ್ವಿ॒ದ್ಯಾಮೇ॒ಷಂ ವೃ॒ಜನಂ॑ ಜೀ॒ರದಾ॑ನುಂ ॥

अता॑रिष्म॒ तम॑सस्पा॒रम॒स्य प्रति॑ वां॒ स्तोमो॑ अश्विनावधायि । एह या॑तं प॒थिभि॑र्देव॒यानै॑र्वि॒द्यामे॒षं वृ॒जनं॑ जी॒रदा॑नुं ॥