ಸೂಕ್ತ 149

ಮ॒ಹಃ ಸ ರಾ॒ಯ ಏಷ॑ತೇ॒ ಪತಿ॒ರ್ದನ್ನಿ॒ನ ಇ॒ನಸ್ಯ॒ ವಸು॑ನಃ ಪ॒ದ ಆ । ಉಪ॒ ಧ್ರಜಂ॑ತ॒ಮದ್ರ॑ಯೋ ವಿ॒ಧನ್ನಿತ್ ॥

म॒हः स रा॒य एष॑ते॒ पति॒र्दन्नि॒न इ॒नस्य॒ वसु॑नः प॒द आ । उप॒ ध्रजं॑त॒मद्र॑यो वि॒धन्नित् ॥

ಸ ಯೋ ವೃಷಾ॑ ನ॒ರಾಂ ನ ರೋದ॑ಸ್ಯೋಃ॒ ಶ್ರವೋ॑ಭಿ॒ರಸ್ತಿ॑ ಜೀ॒ವಪೀ॑ತಸರ್ಗಃ । ಪ್ರ ಯಃ ಸ॑ಸ್ರಾ॒ಣಃ ಶಿ॑ಶ್ರೀ॒ತ ಯೋನೌ॑ ॥

स यो वृषा॑ न॒रां न रोद॑स्योः॒ श्रवो॑भि॒रस्ति॑ जी॒वपी॑तसर्गः । प्र यः स॑स्रा॒णः शि॑श्री॒त योनौ॑ ॥

ಆ ಯಃ ಪುರಂ॒ ನಾರ್ಮಿ॑ಣೀ॒ಮದೀ॑ದೇ॒ದತ್ಯಃ॑ ಕ॒ವಿರ್ನ॑ಭ॒ನ್ಯೋ॒೩॒॑ ನಾರ್ವಾ॑ । ಸೂರೋ॒ ನ ರು॑ರು॒ಕ್ವಾಞ್ಛ॒ತಾತ್ಮಾ॑ ॥

आ यः पुरं॒ नार्मि॑णी॒मदी॑दे॒दत्यः॑ क॒विर्न॑भ॒न्यो॒३॒॑ नार्वा॑ । सूरो॒ न रु॑रु॒क्वाञ्छ॒तात्मा॑ ॥

ಅ॒ಭಿ ದ್ವಿ॒ಜನ್ಮಾ॒ ತ್ರೀ ರೋ॑ಚ॒ನಾನಿ॒ ವಿಶ್ವಾ॒ ರಜಾಂ॑ಸಿ ಶುಶುಚಾ॒ನೋ ಅ॑ಸ್ಥಾತ್ । ಹೋತಾ॒ ಯಜಿ॑ಷ್ಠೋ ಅ॒ಪಾಂ ಸ॒ಧಸ್ಥೇ॑ ॥

अ॒भि द्वि॒जन्मा॒ त्री रो॑च॒नानि॒ विश्वा॒ रजां॑सि शुशुचा॒नो अ॑स्थात् । होता॒ यजि॑ष्ठो अ॒पां स॒धस्थे॑ ॥

ಅ॒ಯಂ ಸ ಹೋತಾ॒ ಯೋ ದ್ವಿ॒ಜನ್ಮಾ॒ ವಿಶ್ವಾ॑ ದ॒ಧೇ ವಾರ್ಯಾ॑ಣಿ ಶ್ರವ॒ಸ್ಯಾ । ಮರ್ತೋ॒ ಯೋ ಅ॑ಸ್ಮೈ ಸು॒ತುಕೋ॑ ದ॒ದಾಶ॑ ॥

अ॒यं स होता॒ यो द्वि॒जन्मा॒ विश्वा॑ द॒धे वार्या॑णि श्रव॒स्या । मर्तो॒ यो अ॑स्मै सु॒तुको॑ द॒दाश॑ ॥