ಈ ಸೂಕ್ತಕ್ಕೆ ಅಡ್ಮಿನ್‌ನಲ್ಲಿ ಕನ್ನಡ ಅಧ್ಯಯನ ಮಾರ್ಗದರ್ಶಿ (Study Guide) ಇನ್ನೂ ರಚನೆಯಾಗಿಲ್ಲ. ಅಡ್ಮಿನ್‌ನಲ್ಲಿ Generate Study Guides ಮೂಲಕ ಕನ್ನಡ ಭಾಷೆಯನ್ನು ಆಯ್ಕೆಮಾಡಿ ರಚಿಸಬಹುದು.
ಇ॒ದಂ ಶ್ರೇಷ್ಠಂ॒ ಜ್ಯೋತಿ॑ಷಾಂ॒ ಜ್ಯೋತಿ॒ರಾಗಾ॑ಚ್ಚಿ॒ತ್ರಃ ಪ್ರ॑ಕೇ॒ತೋ ಅ॑ಜನಿಷ್ಟ॒ ವಿಭ್ವಾ॑ । ಯಥಾ॒ ಪ್ರಸೂ॑ತಾ ಸವಿ॒ತುಃ ಸ॒ವಾಯಁ॑ ಏ॒ವಾ ರಾತ್ರ್ಯು॒ಷಸೇ॒ ಯೋನಿ॑ಮಾರೈಕ್ ॥
इ॒दं श्रेष्ठं॒ ज्योति॑षां॒ ज्योति॒रागा॑च्चि॒त्रः प्र॑के॒तो अ॑जनिष्ट॒ विभ्वा॑ । यथा॒ प्रसू॑ता सवि॒तुः स॒वायँ॑ ए॒वा रात्र्यु॒षसे॒ योनि॑मारैक् ॥
ರುಶ॑ದ್ವತ್ಸಾ॒ ರುಶ॑ತೀ ಶ್ವೇ॒ತ್ಯಾಗಾ॒ದಾರೈ॑ಗು ಕೃ॒ಷ್ಣಾ ಸದ॑ನಾನ್ಯಸ್ಯಾಃ । ಸ॒ಮಾ॒ನಬಂ॑ಧೂ ಅ॒ಮೃತೇ॑ ಅನೂ॒ಚೀ ದ್ಯಾವಾ॒ ವರ್ಣಂ॑ ಚರತ ಆಮಿನಾ॒ನೇ ॥
रुश॑द्वत्सा॒ रुश॑ती श्वे॒त्यागा॒दारै॑गु कृ॒ष्णा सद॑नान्यस्याः । स॒मा॒नबं॑धू अ॒मृते॑ अनू॒ची द्यावा॒ वर्णं॑ चरत आमिना॒ने ॥
ಸ॒ಮಾ॒ನೋ ಅಧ್ವಾ॒ ಸ್ವಸ್ರೋ॑ರನಂ॒ತಸ್ತಮ॒ನ್ಯಾನ್ಯಾ॑ ಚರತೋ ದೇ॒ವಶಿ॑ಷ್ಟೇ । ನ ಮೇ॑ಥೇತೇ॒ ನ ತ॑ಸ್ಥತುಃ ಸು॒ಮೇಕೇ॒ ನಕ್ತೋ॒ಷಾಸಾ॒ ಸಮ॑ನಸಾ॒ ವಿರೂ॑ಪೇ ॥
स॒मा॒नो अध्वा॒ स्वस्रो॑रनं॒तस्तम॒न्यान्या॑ चरतो दे॒वशि॑ष्टे । न मे॑थेते॒ न त॑स्थतुः सु॒मेके॒ नक्तो॒षासा॒ सम॑नसा॒ विरू॑पे ॥
ಭಾಸ್ವ॑ತೀ ನೇ॒ತ್ರೀ ಸೂ॒ನೃತಾ॑ನಾ॒ಮಚೇ॑ತಿ ಚಿ॒ತ್ರಾ ವಿ ದುರೋ॑ ನ ಆವಃ । ಪ್ರಾರ್ಪ್ಯಾ॒ ಜಗ॒ದ್ವ್ಯು॑ ನೋ ರಾ॒ಯೋ ಅ॑ಖ್ಯದು॒ಷಾ ಅ॑ಜೀಗ॒ರ್ಭುವ॑ನಾನಿ॒ ವಿಶ್ವಾ॑ ॥
भास्व॑ती ने॒त्री सू॒नृता॑ना॒मचे॑ति चि॒त्रा वि दुरो॑ न आवः । प्रार्प्या॒ जग॒द्व्यु॑ नो रा॒यो अ॑ख्यदु॒षा अ॑जीग॒र्भुव॑नानि॒ विश्वा॑ ॥
ಜಿ॒ಹ್ಮ॒ಶ್ಯೇ॒೩॒॑ ಚರಿ॑ತವೇ ಮ॒ಘೋನ್ಯಾ॑ಭೋ॒ಗಯ॑ ಇ॒ಷ್ಟಯೇ॑ ರಾ॒ಯ ಉ॑ ತ್ವಂ । ದ॒ಭ್ರಂ ಪಶ್ಯ॑ದ್ಭ್ಯ ಉರ್ವಿ॒ಯಾ ವಿ॒ಚಕ್ಷ॑ ಉ॒ಷಾ ಅ॑ಜೀಗ॒ರ್ಭುವ॑ನಾನಿ॒ ವಿಶ್ವಾ॑ ॥
जि॒ह्म॒श्ये॒३॒॑ चरि॑तवे म॒घोन्या॑भो॒गय॑ इ॒ष्टये॑ रा॒य उ॑ त्वं । द॒भ्रं पश्य॑द्भ्य उर्वि॒या वि॒चक्ष॑ उ॒षा अ॑जीग॒र्भुव॑नानि॒ विश्वा॑ ॥
ಕ್ಷ॒ತ್ರಾಯ॑ ತ್ವಂ॒ ಶ್ರವ॑ಸೇ ತ್ವಂ ಮಹೀ॒ಯಾ ಇ॒ಷ್ಟಯೇ॑ ತ್ವ॒ಮರ್ಥ॑ಮಿವ ತ್ವಮಿ॒ತ್ಯೈ । ವಿಸ॑ದೃಶಾ ಜೀವಿ॒ತಾಭಿ॑ಪ್ರ॒ಚಕ್ಷ॑ ಉ॒ಷಾ ಅ॑ಜೀಗ॒ರ್ಭುವ॑ನಾನಿ॒ ವಿಶ್ವಾ॑ ॥
क्ष॒त्राय॑ त्वं॒ श्रव॑से त्वं मही॒या इ॒ष्टये॑ त्व॒मर्थ॑मिव त्वमि॒त्यै । विस॑दृशा जीवि॒ताभि॑प्र॒चक्ष॑ उ॒षा अ॑जीग॒र्भुव॑नानि॒ विश्वा॑ ॥
ಏ॒ಷಾ ದಿ॒ವೋ ದು॑ಹಿ॒ತಾ ಪ್ರತ್ಯ॑ದರ್ಶಿ ವ್ಯು॒ಚ್ಛಂತೀ॑ ಯುವ॒ತಿಃ ಶು॒ಕ್ರವಾ॑ಸಾಃ । ವಿಶ್ವ॒ಸ್ಯೇಶಾ॑ನಾ॒ ಪಾರ್ಥಿ॑ವಸ್ಯ॒ ವಸ್ವ॒ ಉಷೋ॑ ಅ॒ದ್ಯೇಹ ಸು॑ಭಗೇ॒ ವ್ಯು॑ಚ್ಛ ॥
ए॒षा दि॒वो दु॑हि॒ता प्रत्य॑दर्शि व्यु॒च्छंती॑ युव॒तिः शु॒क्रवा॑साः । विश्व॒स्येशा॑ना॒ पार्थि॑वस्य॒ वस्व॒ उषो॑ अ॒द्येह सु॑भगे॒ व्यु॑च्छ ॥
ಪ॒ರಾ॒ಯ॒ತೀ॒ನಾಮನ್ವೇ॑ತಿ॒ ಪಾಥ॑ ಆಯತೀ॒ನಾಂ ಪ್ರ॑ಥ॒ಮಾ ಶಶ್ವ॑ತೀನಾಂ । ವ್ಯು॒ಚ್ಛಂತೀ॑ ಜೀ॒ವಮು॑ದೀ॒ರಯಂ॑ತ್ಯು॒ಷಾ ಮೃ॒ತಂ ಕಂ ಚ॒ನ ಬೋ॒ಧಯಂ॑ತೀ ॥
प॒रा॒य॒ती॒नामन्वे॑ति॒ पाथ॑ आयती॒नां प्र॑थ॒मा शश्व॑तीनां । व्यु॒च्छंती॑ जी॒वमु॑दी॒रयं॑त्यु॒षा मृ॒तं कं च॒न बो॒धयं॑ती ॥
ಉಷೋ॒ ಯದ॒ಗ್ನಿಂ ಸ॒ಮಿಧೇ॑ ಚ॒ಕರ್ಥ॒ ವಿ ಯದಾವ॒ಶ್ಚಕ್ಷ॑ಸಾ॒ ಸೂರ್ಯ॑ಸ್ಯ । ಯನ್ಮಾನು॑ಷಾನ್ಯ॒ಕ್ಷ್ಯಮಾ॑ಣಾಁ॒ ಅಜೀ॑ಗ॒ಸ್ತದ್ದೇ॒ವೇಷು॑ ಚಕೃಷೇ ಭ॒ದ್ರಮಪ್ನಃ॑ ॥
उषो॒ यद॒ग्निं स॒मिधे॑ च॒कर्थ॒ वि यदाव॒श्चक्ष॑सा॒ सूर्य॑स्य । यन्मानु॑षान्य॒क्ष्यमा॑णाँ॒ अजी॑ग॒स्तद्दे॒वेषु॑ चकृषे भ॒द्रमप्नः॑ ॥
ಕಿಯಾ॒ತ್ಯಾ ಯತ್ಸ॒ಮಯಾ॒ ಭವಾ॑ತಿ॒ ಯಾ ವ್ಯೂ॒ಷುರ್ಯಾಶ್ಚ॑ ನೂ॒ನಂ ವ್ಯು॒ಚ್ಛಾನ್ । ಅನು॒ ಪೂರ್ವಾಃ॑ ಕೃಪತೇ ವಾವಶಾ॒ನಾ ಪ್ರ॒ದೀಧ್ಯಾ॑ನಾ॒ ಜೋಷ॑ಮ॒ನ್ಯಾಭಿ॑ರೇತಿ ॥
किया॒त्या यत्स॒मया॒ भवा॑ति॒ या व्यू॒षुर्याश्च॑ नू॒नं व्यु॒च्छान् । अनु॒ पूर्वाः॑ कृपते वावशा॒ना प्र॒दीध्या॑ना॒ जोष॑म॒न्याभि॑रेति ॥
ಈ॒ಯುಷ್ಟೇ ಯೇ ಪೂರ್ವ॑ತರಾ॒ಮಪ॑ಶ್ಯನ್ವ್ಯು॒ಚ್ಛಂತೀ॑ಮು॒ಷಸಂ॒ ಮರ್ತ್ಯಾ॑ಸಃ । ಅ॒ಸ್ಮಾಭಿ॑ರೂ॒ ನು ಪ್ರ॑ತಿ॒ಚಕ್ಷ್ಯಾ॑ಭೂ॒ದೋ ತೇ ಯಂ॑ತಿ॒ ಯೇ ಅ॑ಪ॒ರೀಷು॒ ಪಶ್ಯಾ॑ನ್ ॥
ई॒युष्टे ये पूर्व॑तरा॒मप॑श्यन्व्यु॒च्छंती॑मु॒षसं॒ मर्त्या॑सः । अ॒स्माभि॑रू॒ नु प्र॑ति॒चक्ष्या॑भू॒दो ते यं॑ति॒ ये अ॑प॒रीषु॒ पश्या॑न् ॥
ಯಾ॒ವ॒ಯದ್ದ್ವೇ॑ಷಾ ಋತ॒ಪಾ ಋ॑ತೇ॒ಜಾಃ ಸು॑ಮ್ನಾ॒ವರೀ॑ ಸೂ॒ನೃತಾ॑ ಈ॒ರಯಂ॑ತೀ । ಸು॒ಮಂ॒ಗ॒ಲೀರ್ಬಿಭ್ರ॑ತೀ ದೇ॒ವವೀ॑ತಿಮಿ॒ಹಾದ್ಯೋಷಃ॒ ಶ್ರೇಷ್ಠ॑ತಮಾ॒ ವ್ಯು॑ಚ್ಛ ॥
या॒व॒यद्द्वे॑षा ऋत॒पा ऋ॑ते॒जाः सु॑म्ना॒वरी॑ सू॒नृता॑ ई॒रयं॑ती । सु॒मं॒ग॒लीर्बिभ्र॑ती दे॒ववी॑तिमि॒हाद्योषः॒ श्रेष्ठ॑तमा॒ व्यु॑च्छ ॥
ಶಶ್ವ॑ತ್ಪು॒ರೋಷಾ ವ್ಯು॑ವಾಸ ದೇ॒ವ್ಯಥೋ॑ ಅ॒ದ್ಯೇದಂ ವ್ಯಾ॑ವೋ ಮ॒ಘೋನೀ॑ । ಅಥೋ॒ ವ್ಯು॑ಚ್ಛಾ॒ದುತ್ತ॑ರಾಁ॒ ಅನು॒ ದ್ಯೂನ॒ಜರಾ॒ಮೃತಾ॑ ಚರತಿ ಸ್ವ॒ಧಾಭಿಃ॑ ॥
शश्व॑त्पु॒रोषा व्यु॑वास दे॒व्यथो॑ अ॒द्येदं व्या॑वो म॒घोनी॑ । अथो॒ व्यु॑च्छा॒दुत्त॑राँ॒ अनु॒ द्यून॒जरा॒मृता॑ चरति स्व॒धाभिः॑ ॥
ವ್ಯಂ೧॒॑ಜಿಭಿ॑ರ್ದಿ॒ವ ಆತಾ॑ಸ್ವದ್ಯೌ॒ದಪ॑ ಕೃ॒ಷ್ಣಾಂ ನಿ॒ರ್ಣಿಜಂ॑ ದೇ॒ವ್ಯಾ॑ವಃ । ಪ್ರ॒ಬೋ॒ಧಯಂ॑ತ್ಯರು॒ಣೇಭಿ॒ರಶ್ವೈ॒ರೋಷಾ ಯಾ॑ತಿ ಸು॒ಯುಜಾ॒ ರಥೇ॑ನ ॥
व्यं१॒॑जिभि॑र्दि॒व आता॑स्वद्यौ॒दप॑ कृ॒ष्णां नि॒र्णिजं॑ दे॒व्या॑वः । प्र॒बो॒धयं॑त्यरु॒णेभि॒रश्वै॒रोषा या॑ति सु॒युजा॒ रथे॑न ॥
ಆ॒ವಹಂ॑ತೀ॒ ಪೋಷ್ಯಾ॒ ವಾರ್ಯಾ॑ಣಿ ಚಿ॒ತ್ರಂ ಕೇ॒ತುಂ ಕೃ॑ಣುತೇ॒ ಚೇಕಿ॑ತಾನಾ । ಈ॒ಯುಷೀ॑ಣಾಮುಪ॒ಮಾ ಶಶ್ವ॑ತೀನಾಂ ವಿಭಾತೀ॒ನಾಂ ಪ್ರ॑ಥ॒ಮೋಷಾ ವ್ಯ॑ಶ್ವೈತ್ ॥
आ॒वहं॑ती॒ पोष्या॒ वार्या॑णि चि॒त्रं के॒तुं कृ॑णुते॒ चेकि॑ताना । ई॒युषी॑णामुप॒मा शश्व॑तीनां विभाती॒नां प्र॑थ॒मोषा व्य॑श्वैत् ॥
ಉದೀ॑ರ್ಧ್ವಂ ಜೀ॒ವೋ ಅಸು॑ರ್ನ॒ ಆಗಾ॒ದಪ॒ ಪ್ರಾಗಾ॒ತ್ತಮ॒ ಆ ಜ್ಯೋತಿ॑ರೇತಿ । ಆರೈ॒ಕ್ಪಂಥಾಂ॒ ಯಾತ॑ವೇ॒ ಸೂರ್ಯಾ॒ಯಾಗ॑ನ್ಮ॒ ಯತ್ರ॑ ಪ್ರತಿ॒ರಂತ॒ ಆಯುಃ॑ ॥
उदी॑र्ध्वं जी॒वो असु॑र्न॒ आगा॒दप॒ प्रागा॒त्तम॒ आ ज्योति॑रेति । आरै॒क्पंथां॒ यात॑वे॒ सूर्या॒याग॑न्म॒ यत्र॑ प्रति॒रंत॒ आयुः॑ ॥
ಸ್ಯೂಮ॑ನಾ ವಾ॒ಚ ಉದಿ॑ಯರ್ತಿ॒ ವಹ್ನಿಃ॒ ಸ್ತವಾ॑ನೋ ರೇ॒ಭ ಉ॒ಷಸೋ॑ ವಿಭಾ॒ತೀಃ । ಅ॒ದ್ಯಾ ತದು॑ಚ್ಛ ಗೃಣ॒ತೇ ಮ॑ಘೋನ್ಯ॒ಸ್ಮೇ ಆಯು॒ರ್ನಿ ದಿ॑ದೀಹಿ ಪ್ರ॒ಜಾವ॑ತ್ ॥
स्यूम॑ना वा॒च उदि॑यर्ति॒ वह्निः॒ स्तवा॑नो रे॒भ उ॒षसो॑ विभा॒तीः । अ॒द्या तदु॑च्छ गृण॒ते म॑घोन्य॒स्मे आयु॒र्नि दि॑दीहि प्र॒जाव॑त् ॥
ಯಾ ಗೋಮ॑ತೀರು॒ಷಸಃ॒ ಸರ್ವ॑ವೀರಾ ವ್ಯು॒ಚ್ಛಂತಿ॑ ದಾ॒ಶುಷೇ॒ ಮರ್ತ್ಯಾ॑ಯ । ವಾ॒ಯೋರಿ॑ವ ಸೂ॒ನೃತಾ॑ನಾಮುದ॒ರ್ಕೇ ತಾ ಅ॑ಶ್ವ॒ದಾ ಅ॑ಶ್ನವತ್ಸೋಮ॒ಸುತ್ವಾ॑ ॥
या गोम॑तीरु॒षसः॒ सर्व॑वीरा व्यु॒च्छंति॑ दा॒शुषे॒ मर्त्या॑य । वा॒योरि॑व सू॒नृता॑नामुद॒र्के ता अ॑श्व॒दा अ॑श्नवत्सोम॒सुत्वा॑ ॥
ಮಾ॒ತಾ ದೇ॒ವಾನಾ॒ಮದಿ॑ತೇ॒ರನೀ॑ಕಂ ಯ॒ಜ್ಞಸ್ಯ॑ ಕೇ॒ತುರ್ಬೃ॑ಹ॒ತೀ ವಿ ಭಾ॑ಹಿ । ಪ್ರ॒ಶ॒ಸ್ತಿ॒ಕೃದ್ಬ್ರಹ್ಮ॑ಣೇ ನೋ॒ ವ್ಯು೧॒॑ಚ್ಛಾ ನೋ॒ ಜನೇ॑ ಜನಯ ವಿಶ್ವವಾರೇ ॥
मा॒ता दे॒वाना॒मदि॑ते॒रनी॑कं य॒ज्ञस्य॑ के॒तुर्बृ॑ह॒ती वि भा॑हि । प्र॒श॒स्ति॒कृद्ब्रह्म॑णे नो॒ व्यु१॒॑च्छा नो॒ जने॑ जनय विश्ववारे ॥
ಯಚ್ಚಿ॒ತ್ರಮಪ್ನ॑ ಉ॒ಷಸೋ॒ ವಹಂ॑ತೀಜಾ॒ನಾಯ॑ ಶಶಮಾ॒ನಾಯ॑ ಭ॒ದ್ರಂ । ತನ್ನೋ॑ ಮಿ॒ತ್ರೋ ವರು॑ಣೋ ಮಾಮಹಂತಾ॒ಮದಿ॑ತಿಃ॒ ಸಿಂಧುಃ॑ ಪೃಥಿ॒ವೀ ಉ॒ತ ದ್ಯೌಃ ॥
यच्चि॒त्रमप्न॑ उ॒षसो॒ वहं॑तीजा॒नाय॑ शशमा॒नाय॑ भ॒द्रं । तन्नो॑ मि॒त्रो वरु॑णो मामहंता॒मदि॑तिः॒ सिंधुः॑ पृथि॒वी उ॒त द्यौः ॥