Sūkta 86

मरु॑तो॒ यस्य॒ हि क्षये॑ पा॒था दि॒वो वि॑महसः । स सु॑गो॒पात॑मो॒ जनः॑ ॥

máruto yásya hí kṣáye pāthā́ divó vimahasaḥ ǀ sá sugopā́tamo jánaḥ ǁ

य॒ज्ञैर्वा॑ यज्ञवाहसो॒ विप्र॑स्य वा मती॒नां । मरु॑तः शृणु॒ता हवं॑ ॥

yajñáirvā yajñavāhaso víprasya vā matīnā́m ǀ márutaḥ śṛṇutā́ hávam ǁ

उ॒त वा॒ यस्य॑ वा॒जिनोऽनु॒ विप्र॒मत॑क्षत । स गंता॒ गोम॑ति व्र॒जे ॥

utá vā yásya vājínó’nu vípramátakṣata ǀ sá gántā gómati vrajé ǁ

अ॒स्य वी॒रस्य॑ ब॒र्हिषि॑ सु॒तः सोमो॒ दिवि॑ष्टिषु । उ॒क्थं मद॑श्च शस्यते ॥

asyá vīrásya barhíṣi sutáḥ sómo díviṣṭiṣu ǀ ukthám mádaśca śasyate ǁ

अ॒स्य श्रो॑षं॒त्वा भुवो॒ विश्वा॒ यश्च॑र्ष॒णीर॒भि । सूरं॑ चित्स॒स्रुषी॒रिषः॑ ॥

asyá śroṣantvā́ bhúvo víśvā yáścarṣaṇī́rabhí ǀ sū́ram citsasrúṣīríṣaḥ ǁ

पू॒र्वीभि॒र्हि द॑दाशि॒म श॒रद्भि॑र्मरुतो व॒यं । अवो॑भिश्चर्षणी॒नां ॥

pūrvī́bhirhí dadāśimá śarádbhirmaruto vayám ǀ ávobhiścarṣaṇīnā́m ǁ

सु॒भगः॒ स प्र॑यज्यवो॒ मरु॑तो अस्तु॒ मर्त्यः॑ । यस्य॒ प्रयां॑सि॒ पर्ष॑थ ॥

subhágaḥ sá prayajyavo máruto astu mártyaḥ ǀ yásya práyāṃsi párṣatha ǁ

श॒श॒मा॒नस्य॑ वा नरः॒ स्वेद॑स्य सत्यशवसः । वि॒दा काम॑स्य॒ वेन॑तः ॥

śaśamānásya vā naraḥ svédasya satyaśavasaḥ ǀ vidā́ kā́masya vénataḥ ǁ

यू॒यं तत्स॑त्यशवस आ॒विष्क॑र्त महित्व॒ना । विध्य॑ता वि॒द्युता॒ रक्षः॑ ॥

yūyám tátsatyaśavasa āvíṣkarta mahitvanā́ ǀ vídhyatā vidyútā rákṣaḥ ǁ

गूह॑ता॒ गुह्यं॒ तमो॒ वि या॑त॒ विश्व॑म॒त्रिणं॑ । ज्योति॑ष्कर्ता॒ यदु॒श्मसि॑ ॥

gū́hatā gúhyam támo ví yāta víśvamatríṇam ǀ jyótiṣkartā yáduśmási ǁ